古星輝 - 玩轉5G數據 | 乜都5G
北上玩樂成風，加上深中通道上月底開通，相信跨境消費的熱潮會繼續維持。同事早前做咗統計，發現由年初至5月期間，我哋嘅客戶平均每月北上4日，每日用量可以高達4GB，而內地及澳門漫遊數據活躍用戶數目更大幅躍升咗7成，突顯客戶對內地及澳門嘅數據需求。
內地擁有全球規模最大之一嘅5G網絡，一線城市嘅覆蓋率達8成半以上，主幹道嘅平均5G覆蓋率更達到9成，難怪有所謂「縣縣通5G」嘅講法。5G不但覆蓋內地主要城市，就連珠穆朗瑪峰都有5G。珠玉在前，大灣區各重點城巿亦竭力發展5G通訊，加快5G通全國嘅步伐。
看準港澳及內地有更緊密聯繫，又適逢暑假旅遊旺季，激發咗我哋嘅新思維，全力革新5G數據嘅使用概念，率先打通港澳及內地嘅5G數據，破天荒推出咗一種本地數據三地通用嘅服務，等客戶無論身處港澳或內地，都可以按需要自由配搭使用5G數據，重點係無額外收費。對客戶來講，真係簡單直接。
能捨才能得
眾所周知，漫遊數據收費一般比本地數據高；要做到本地5G數據三地通用，即係本地數據當漫遊用，對電訊商來講有辣有唔辣。呢個新概念，正正體現咗「能捨才能得」嘅道理；一方面真正便利客戶，同時亦藉此吸引及鼓勵更多客戶升級轉用5G。做到5G數據三地自「遊」行，客戶可以隨時隨地安心北上或者過大海，毋須買漫遊卡，毋須換卡；喺內地更加可專享「全網通」服務，即係喺收唔到網絡A嘅地方，可以連接至國內其他主要電訊商繼續使用。
今時今日北上，有埋一卡兩號更方便。但唔講可能無咩人留意到，原來宜家喺香港都可以用內地電話號碼發送短訊或致電內地，而喺內地打內地流動電話，或者任何香港號碼，唔使加國家及地區編號都打得通，超方便！
北上叫車及訂枱食飯，內地習慣係要同客戶對一對電話最尾4個數字。我哋最近就加咗一個好貼心嘅配對服務，特別幫客戶配對尾4個數字同香港號碼相同嘅內地號碼。有咗「孖號」，大家喺內地叫車訂座俾人問起，即刻講得出電話號碼尾4個數字，呢啲就真係北上達人喇。
聽講有行家留意到我哋本地5G數據三地用嘅新概念，隨即推出咗類似嘅服務計劃。但其實無論係用5G數據自「遊」行、「$0漫遊」或「5G共享數據」等字眼，我哋大家都係以提升客戶嘅流動通訊體驗為大前提。要體驗5G嘅無遠弗屆，你升級咗未？
和記電訊香港執行董事及行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com