其實顯然易見，今年餘下落嚟嘅時間美股必然會向好，更加會再創新高。 (Spencer Platt via Getty Images)
喺股票市場入邊，所有已經發生咗嘅事，都唔會再值錢，值錢嘅係未來嘅事。
下載Yahoo財經APP
美股外幣即時報價 多國新聞任睇
股市揸貨人心情齊波動
過去
一個星期，股價嘅波動故知然大，更大嘅波動係市場嘅預期，以及揸貨人嘅內心世界。黑色星期一美股大跌之日，當日預言美股熊市開始者眾，隨後股價已經開始反彈。究竟大跌當日，有冇低位反手沽空？定係大手吸納？到今日呢種爭論已經唔重要，本欄認為毋需再對低位股災派進行嘲諷，放眼未來直至年底嘅睇法，比起糾纏有冇股災更重要。
其實顯然易見，今年餘下落嚟嘅時間美股必然會向好，更加會再創新高，只係相應嘅事件未發生。
減息隨時變升市主因
第一件事就係減息。雖然過去分析好喜歡講市場已經反映減息預期，但係一來股災後大部份憧憬已經蒸發，另一方面即使有預期，反映都只會越接近反映得越多，同真實水平比會稍為不足。更重要係，大部份嘅分析都係風吹邊面跟邊面，到聯儲局第一次減息後，市場必定出現更激進嘅減息預期，即使最終聯儲局冇做得咁盡，吹捧減息預期將會成為下半年升市主因。若果不幸九月一次過減0.5厘，做文章嘅力度將會更強勁。
世上應該冇幾多隻股份，大股東減持佢嘅持倉一半，期內都仲可以破紀頂。 (Yui Mok - PA Images via Getty Images)
第二，蘋果股價依然強勁。世上應該冇幾多隻股份，大股東減持佢嘅持倉一半，期內都仲可以破紀頂。即使畢菲特露牌減倉後，股價由低位持續反彈，估計畢菲特有剩嘅一半股份，喺今個季度都會陸續清倉，市場食得曬佢啲貨之餘仲有力上升，反映市場資金好強勁。另一方面， iPhone 16必然大賣，過去五至到六個版本嘅iPhone，明顯毫無創意，但係一樣照舊將股價推上高位，今次加入AI人工智能技術，即使只係一個噱頭，但同時亦係比現有iPhone用戶換機嘅最大藉口。
第三，股王Nvidia(NVDA) 10月7日至10月9日將會舉行AI高峰會，經歷過上次黃仁勳旋風式訪台，將Nvidia股價推上歷史高位，仲帶埋一眾台股兄弟破頂，相信世上冇人推股能力勁得過佢。同期加映Tesla行政總裁馬斯克可能喺10月10日公布RoboTaxi細節，講可能因為佢已經甩過一次底，但係如果10月10號準時推出嘅話，就算Tesla唔升，相信好多周邊股份都會利好，情況好似OpenAI爆紅，最終受惠股係Nvidia一樣。
股票市場嘅好淡增持，就係一個講故事能力比賽嘅辯論會，睇好睇淡角有支持者，但係若果純粹睇牌面，你會相信黃仁勳、伊隆馬講故事，定低位股災派講故事？咁就悉隨尊便囉。
股王Nvidia(NVDA) 10月7日至10月9日將會舉行AI高峰會。 (ASSOCIATED PRESS)
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com