息口趨降，定存派睇嚟將要進入息口寒冬。 (SOPA Images via Getty Images)
美國聯儲局首次減息就減半厘，根據利率期貨顯示，至年底利率將減至4厘至4.25厘，利率持續下跌，過去超過一年最大的投資派別：定存派，睇嚟將要進入息口寒冬。
美股外幣即時報價 多國新聞任睇
掃AI晶片情況將更瘋狂
今次利率下跌可能並唔同過去咁多次減嚇息咁簡單。黃仁勳10月2日接受CNBC訪問時表示，最新一代Blackwell架構AI晶片已全面投產，且市場需求如「失去理智般瘋狂」。
AI 技術需要大量嘅計算能力，而GPU 喺深度學習同AI訓練中係核心設備。當利率下降，資金流入AI技術將會加速，因為企業希望借住呢個低成本資金環境擴展其技術能力。無論係數據中心、雲計算平台，抑或自家AI研發部門，低息環境買AI晶片情況會更瘋狂。
黃仁勳10月2日接受CNBC訪問時表示，最新一代Blackwell架構AI晶片已全面投產，且市場需求如「失去理智般瘋狂」。 (Chip Somodevilla via Getty Images)
資金成本低 谷AI投資
更重要嘅係，AI 技術並唔只係用喺計算機領域，佢仲會滲透到唔同嘅行業。重覆性嘅文書工作，例如數據處理、法律文件審查、財務報告生成等，都會因 AI 自動化工具而被取代。現時，AI 技術已經可以自動撰寫報告、處理法律合約，甚至生成影片或文章。隨住技術進一步成熟，重覆性同高效嘅文書工作唔需要勞力密集，取而代之係AI同自動化軟件。
黃仁勳雖然亦辯護過，企業使用AI賺錢多咗，將會請更多人。姑勿論最終係咪走呢條路，短期可見就係AI直接取代人類。最簡單貨車自動駕駛，之前全球貸車司機荒、高薪搶人材嘅需求就下降，至少人工上漲會被自動駕駛限制，一旦技術成熟及立法通過可以無人駕駛，甚至未必再有全職司機，只會有個人跟車做保安，類似火車鐵路咁。
工廠式勞動力將會面臨一個快速被自動化取代嘅趨勢。 (Monty Rakusen via Getty Images)
更重要係，AI嘅驅動硬件——機械人，亦都漸漸成熟，一般工廠已經大規模。當企業能夠以低成本融資，佢哋會更積極投資於自動化生產設備。
以Tesla（TSLA）公佈機械人嘅影片嚟睇，現時機械人技術應係可以喺固定工廠環境下進行理解同工作，一般家庭或中小企嘅靈活工作環境應該未得，但工廠式勞動力將會面臨一個快速被自動化取代嘅趨勢。現時已經有唔少企業使用機械人進行產品裝配、包裝、運輸等重覆性工作，而隨著自動化成本降低，減人手增加盈利將會係重點，勞工法例越複雜嘅地方，企業越有轉用機械人嘅需要。
今次的減息，拉開嘅差距，唔單止係定存相對其他資產回報，大企業一定借低息環境瘋狂建立AI基建，巨無霸同一般上市公司差距拉遠，同時AI智慧同人類差距亦將會收窄。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com