中環在線：四叔拒評新地我唔想犯罪！ - 李華華
恒地(012)主席李兆基(四叔)係新地(016)大股東郭氏兄弟嘅世叔伯，郭氏兄弟有乜事，大家都想搵四叔評吓理，爆吓料咁，08年三兄弟嗌交，四叔已經做曬和事佬，最近郭氏兩兄弟官非纏身，四叔就唔敢多嘴，話「唔想犯罪」喎！
四叔一向好相與，傳媒問乜答乜，即使之前佢話唔想再做「股評人」，但若有人問，佢忍唔住又會講兩嘴。但新地大股東兼兩位聯席主席郭炳江同郭炳聯被廉署檢控呢單嘢，佢就真係唔敢講。
噚日佢出席一個午宴，一提新地，就落閘放狗，佢解釋自己係新地非執行副主席，有利益關係，唔講得，講咗就「犯罪」。就連問佢點睇郭氏第三代上場，即係指新地委任郭炳江個囝郭基煇同郭炳聯個囝郭顥澧做兩人嘅替代董事，四叔都哦哦。
應付傳媒交行貨
最終四叔求其答，話新地搵第三代上場應該冇問題，兩位後生仔喺外國讀書，多知識，一路有長進雲雲。哇，呢幾句說話用喺好多後生仔身上都得喎，實冇講錯，但家講緊嘅係市值超過2500億嘅新地第三代接班人，四叔會唔會講得求其咗啲呢，定還是四叔真係諗唔到其他正面得嚟又實質嘅評語呢？
傳媒問佢對兩位後生仔有冇信心，四叔連有信心呢類敷衍嘢都唔講，又用「唔想犯罪」嚟推。講句有冇信心都犯罪？！
李華華
mailto:LiWaWa@AppleDaily.com
上一則: 易方達申發RQFII產品
下一則: 中環在線：聯想老細豪派2340萬 - 李華華
中環在線 - 李華華 舊文