投資的天空：醜股短炒勿長揸 - 張士佳
大市持續牛皮，資金明顯聚焦個股，而過去兩日主題自然是醜股大翻身。
長期於低位徘徊的板塊如體育用品股、核電股及資源股等紛紛飛天，部份是靠消息推動，但其餘多數是因忽發的購買力，逼淡友要補倉，令到升勢加速。
從基本面看，大多個股都未見好轉。當然，待有實質證據時，股價或已回升不少，不過基於「寧錯過，莫買錯」的原則，暫時都係當呢類板塊挾淡倉，短炒可以，想買來長揸就要睇定啲先。
講開飛天的弱勢股，話題必離不開思捷(330)。
思捷昨午宣佈委任ZARA母公司前分銷及營運總監Martinez出任集團CEO及執董。
消息公佈後思捷曾升近四成，又難怪市場咁大憧憬，只睇ZARA現時在香港的人流，就知品牌的威力。再睇其母公司Inditex的股價走勢，就知ZARA不論在消費市場抑或投資市場都係咁受歡迎，即管睇下新CEO可唔可以化腐朽為神奇。
組合方面，好友勢凶夾狼，本身的股票淡倉亦一一觸及平倉位，現時只餘銀泰(1833)，如果升穿8.2元亦會平倉，為長期指令。
筆者並未持有上述股票
與曾卓鋒(寶來證券業務經理)聯合執筆(逢周三、五刊出)
作者：張士佳、曾卓鋒(寶來證券(香港)業務經理)
上一則: 青心直說：美國換屆掀震盪 - 胡孟青
下一則: 外幣兌港元
投資的天空 - 張士佳 舊文