金融High Tea 2012年8月8日
金融High Tea——地獄與天堂
2012年8月8日
昨日大市變動唔大，只升74點收場，雖然收在20073點，企在兩萬點樓上，但大市上落唔多，高低波幅只有133點，遠唔夠兩隻大股思捷(330)和渣打(2888)一暴升一暴跌咁戲劇性。
升天嘅係思捷環球(330)。思捷聘請Zara品牌前高層馬丁內斯擔任集團新行政總裁，代替6月突然請辭的范德施。思捷上日偷步升逾6%後，昨日更升到嚇死人，一度狂升38.4%，高見13.8元，最後收市都勁抽28%至12.76元，真係一夫當關，萬夫莫敵。
思捷昨日一升，市值單日增加36億，雖然呢個新行政總裁年薪連花紅高達300萬歐羅(2890萬港元)，但畀2000幾萬執番36億，抵呀。真正問題係呢位仁兄的功夫有幾勁，最後係唔係有本事幫思捷扭轉乾坤。
渣打踩美國地雷
思捷升天，另一隻大股渣打銀行(2888)就跌到地獄。紐約監管機構昨日指渣打與伊朗在過往7年，進行超過2500億美元(1.93萬億港元)的交易，違反聯邦反洗黑錢的法律，警告渣打在美國的業務可能被終止。調查文件指渣打係「流氓銀行」，小心翼翼地籌劃如何隱瞞當局。當局亦點名指德勤會計師行有幫忙隱瞞，刻意在所謂的獨立報告中刪除重要資料。
匯控早前同樣被美國指控為伊朗洗黑錢，馬上扮死狗認錯，並在中期帳目為賠償先撥備7億美元。但渣打反其道而行，昨日發出聲明，強烈否認紐約州金融局對其涉及伊朗交易指令的內容，指涉及伊朗的交易有99.9％符合美國當局建立的規定，只有1400萬美元未符規定。
睇嚟渣打係被迫企硬，因為美國指佢有近20000億元交易違反規定，又講到要吊銷其牌照，按過住其他銀行被指控時要罰10%涉案金額以求和解，渣打要罰近2000億港紙！佢去年賺368億港元，資產淨值3155億，即係罰款可能等同5.3年盈利，或者61%資產淨值，若然真係罰2000億點頂呀？所以渣打唯有先企硬，不能承認。問題是若美國監管機構亦硬打到底的話，渣打死頂又得唔得呢？美國如今對歐資銀行逐個開刀，渣打踩中地雷，驚佢爆斷腳，如果只係炸斷腳趾都算執番身彩啦。
倫敦Liberum資本的分析員估計得無咁誇，話渣打最後可能被罰15億美元(116億港元，約等如三成去年盈利)，在伊朗交易失去10億美元生意額。美銀美林指，雖然渣打的基本面和盈利增長保持不變，但指控將對渣打短期股價有一定衝擊，下調其目標價由219元至186元，評級由「買入」下調至「跑輸大市」。
資金流入 大市成交漲
渣打股價昨日深受打擊，一度跳水21%至149元，收市跌幅略為收窄，但仍勁插15%至160.1元，遠低過美銀美林的目標價。渣打昨日黃昏時在倫敦跌23%，跌幅比香港更大。渣打一年低位140.5元，我估呢劑嘢會令佢跌穿一年低位，散戶如果玩接刀撈底的話，首先要等佢再插深啲才安全啲，第二入貨後要定一成止蝕，要嚴控風險也。
大市轉強，資金有逐步回流港股的跡象。港股上周的日均主板成交量錄得有463億元，較7月和6月的日均數字433億元和452億元高出不少，昨日成交518億，若大市成交量能夠持續放大的話，應該有利大盤進一步挑戰高位。
陸羽仁
上一頁 下一頁
金融High Tea 舊文