2014年2月22日星期六
新春賭局
新年團拜，最佳活動莫過於與一群好友柴娃娃飲酒聚賭，發點新年財。
席間發現其中一位朋友手風奇順，鋪鋪靚牌。問起才知道原來他當天生日。既然壽星仔紅運當頭，大伙兒立即大舉跟風下注。結果策略奏效，煲爆莊大勝而回。
最後埋單，發覺壽星仔自己只贏得少少，反而一眾跟風客收穫甚豐，殺得莊家一頸血。壽星仔曰︰「鬼咩，我買雞碎，你地班友搏老命！ 」。
新春賭局，旨在高興，講到底都是衛生注碼，輸贏得啖笑。只不過見到壽星仔的遭遇，不禁想起自己在股場的慘痛經歷。
話說我一直是濠賭股的粉絲。在最久之前， 開始到處宣導濠賭福音。其中一位信徒，正是我的姐姐。我跟她在幾塊時一起買入了新濠國際（200）。之後, 一路以來, 一時又話打貪, 一時又話經濟放緩，樓市快爆煲云云。結果，阿梅滾水淥腳，賺少少已忍不住雞咁腳急急沽出了。姐姐呢？她幾乎每個月便會詢問我到底應否沽出。我總會專家上身，以專業的口吻分析到︰「升咗咁多，點都要回下，賺咗先啦...」。
但每當她下個月又再問我同一條問題，我便明白到她根本從未賣出過。結果見住股價以倍數飛升， 阿梅又只有戥人高興的份兒了。
無獨有偶，碰巧前兩天又有另一位朋友話要請我吃飯。何解呢？我不明白。原來我之前曾向他推介過一隻叫高德地圖的股票。當時我說它很有機會被阿里收購。結果開口中，前兩天阿里提出收購，朋友得以大撈一票。阿梅呢？見股價郁都唔郁，已老早沽剩雞碎貨尾了。
心態遠比選股重要
問題當然是，大師般堅忍的心境是如何煉成的呢？當錯過一萬次，便會自然學乖。但願這已是第九千九百九十九次吧。
話說回來，見到朋友贏錢，自己又能騙餐茶飲吓，認吓叻吹吹水，都算不錯呀
財經DNA - 阿梅 舊文