金融High Tea 2014年2月23日
騰輪中伏
2014年02月21日
濠賭股續牌成為市場熱議，仲被人形容為「辣招」，好多人各自解讀，甚至講到縮減年期兼提高稅率。不過，熟悉情況的澳門街老友話，縮短年期的說法就有聽過，講到提高稅率，澳門政府?家對抽稅收入都幾滿意，提供稅率可能影響澳門同其他博彩地區的競爭，暫時睇唔到有咁需要喎。
續牌成為濠賭股變數，澳門街老友話呢樣嘢不能忽視，同時也不需過度反應，因為按照現在機制，當局已有途徑管理持牌公司，方法之一係對賭台數目的控制，現時澳門對賭台數目有上限，每年增長跟經濟掛鈎，但點樣批就係政府決定，可見政府從來都對持牌公司有好大影響力。將來如果縮短賭牌數目，當然係想加多個緊箍咒喺佢哋頭上。濠賭股係縮短牌照風聲下窒咗兩日，初步似乎有番啲支持，美高梅中國(2282) 宣佈去年多賺18%，大行齊護航唱好，全日收報31.45元，仲升咗4%𠻹。
濠賭股初步撐住
講完發牌大局，再講吓曾被視為有機會爭取發牌的周錦輝，佢間公司上市後升咗成倍，市值去到400億，以濠賭股嚟講屬於中型股。周錦輝係澳門地膽，老早就喺碼頭整咗個漁人碼頭項目。曾經有猜測若然澳門增發賭牌，周錦輝是「把炮」人士，有無機會成為新牌主呢？照現時風聲睇，呢個機會當然係好微啦。不過，?家漁人碼頭搞緊轉型，會同內地單位合作搞個恐龍館，呢招好明顯係配合政府增加旅遊娛樂措施的政策，就算佢做唔到牌主，漁人碼頭塊靚地對正金沙(1928) ，兩者成日爭來爭去，可見資產仍然有價。
內銀又無運行
除了賭牌外，大市昨日有兩個大消息，一係內地經濟數據曳，匯豐中國2月PMI初值差過預期，預覽值跌至48.3，創七個月新低，加上人民銀行繼周二突然「收水」後，再次實行600億元人民幣正回購操作，搞到恒生指數曾瀉近三百點，失守250天牛熊線(22486) 收市，內銀股全軍覆沒。前日急升的中信銀行(998) ，全日瀉番4%，收報4.29元，為國指包尾成份股。大市就收報22394，挫270點；國企指數收報9978，跌79點，成交金額增加至711億元。
社交網站facebook提出以190億美元，收購即時流動訊息服務商WhatsApp，相等於每名客戶價值逾42美元。騰訊(700) 推出的微訊，服務亦與WhatsApp相同，客戶逾3億，市場初時仲以為公司可受惠估值提升。不過，大行巴克萊發表報告指，WhatsApp每用戶價值約42.22美元，但每戶每年只產生0.99美元的收入，加上不少用戶早已免費下載WhatsApp程式，反而騰訊去年8月起商業化微信，包括通過平台推出遊戲、結合支付平台，覆蓋電召的士的活動，認為微信每用戶價值遠高於WhatsApp，估值300億美元合理。雖然係咁，今次收購將令日後騰訊旗下微信拓展海外網絡市場面臨挑戰，現時WhatsApp有facebook強大支持，將阻礙騰訊拓展海外版圖，相信全球競爭局面已改變，該行只係維持其目標價600元及「增持」評級。
喺大行潑冷水下，加上騰訊及阿里巴巴互相封殺對方支付服務，騰訊不升反跌3%，收報564.5元，散戶炒輪咁就中伏。
陸羽仁
金融High Tea 舊文