趣BLOGBLOG：青蛙不會變王子 - 股榮
娛樂圈不時會聽到有藝人改名報道，尤其是半紅不黑的，或遭遇醜聞後，冀藉此轉運及洗底，惟大部份成效不彰。同樣的劇情經常在股票市場發生，過去五年，每年平均有約120間公司改名，名字完全改變的達到一半，約60間。今年頭三個多月，申請改名的公司已達到37間。
公司改名主要有兩個原因，一是主業改變要配合，另一個是先前個名臭曬，逼不得已換名，希望投資者唔記得當作新公司，重新開始過。股榮一直以為，若要人不知，唔好太低B，公司改命非常阿Q。你見過跌至33蚊的匯豐(005)、早年受毒奶困擾的蒙牛(2319)、甚至輸accumulator輸到就破產的中信泰富(267)要改名轉運嗎？
不過，每年都有逾百隻公司改名，事實只能反映，散戶善忘之餘，不單止可以超低B，還可能是極度白癡，最終一次又一次中招。
跌咗八成可以繼續再跌
上周五落去證券行，旁邊有位中年阿叔，唉唉聲望住股票機，按來按去都是停牌中的中國家居(692)，股榮多口問：「輸好多啊？」阿叔自言自語答：「X你XX、公司蝕錢股價跌，舊年賺錢股價又跌，冇奶由啦！」無端端俾人問候，股榮火都嚟，「聽講遲嚇仲打算配股抽水，復牌後可能有排跌！」阿叔唔忿氣反擊，「高位跌咗八成，仲跌乜X啊！」
為了令阿叔醒覺，股榮打開692上市至今的股價圖，同阿叔上堂數學堂。「阿叔，692今年初高位約1蚊，𠵱家的確跌咗七成有多，但你睇嚇2008年幾多錢，係300蚊，中間不斷配股、拆股合股，𠵱家股價累跌99.9%。阿叔面有難色，口震震死撐，「公司轉型後已經有錢賺，今次唔同啦！」
雖則阿叔已經好慘，但為了讓他知道真相，只好將事實講出。「阿叔，692千禧年上市，當時叫正興做紡織，直至2010年轉型前，股價累跌97%。2009年公司收購中國鐵礦，2010年正式改名為寶源控股，至2013年改名叫中國家居前，股價三年內跌98%。去年轉型做傢俬，但集團董事管理層中，一半仍是寶源當年名單董事。
公司改名未必脫胎換骨
香港人善忘，散戶更加善忘，就算昔日輸到媽媽聲的股票，只要數年後重新包裝，改頭換面，配合眾人環迴大合唱下，原來可以變得美好。橋唔怕舊，最緊要受。
大家買股票前，能否做多少少功課，溫故知新，而非單單聽財演一面之詞，指轉型後脫胎換骨，完全不提改名前蝕到趴街。
青蛙變王子，只會在童話世界出現。所以青蛙改名，你一廂情願癡心錯付，冇保留咀落去，難道佢真的會變王子嗎？
股榮
上一則: 投資導航：滬港通揀股指南
下一則: 美企估值高憂業績見光死標指跌勢兩年最勁
趣BlogBlog - 股榮 舊文