趣BlogBlog：超人新盤「係咁㗎啦，好出奇呀」 - 股榮
【趣BLOG BLOG】超人新盤︰係咁嫁啦！好出奇呀！
家住荃灣，身邊很多區內朋友都問，超人西鐵附近的新盤就快開售，買唔買得過！
一向有話直說的股榮只答，如果唔介意聞到臭坑渠味，或者對長實「別出心裁」的奇則情有獨鍾，我唔會阻你，但千祈千祈千祈要實地直擊，以免怨我一世。
有人話我經常針對超人，但必須聲明，我長揸和黃(013)股票，住緊長實樓，但已是20多年前超人的良心盤，實用率近九成、沒有窗台露台甚至乜叉環保平台。翻查八十至九十年代的年報，長實曾興建多個出色屋苑，樓齡近40年的賽西湖原來也是超人出品，九成超高實用、冠絕豪宅，甚至藍籌屋苑城市花園及黃埔花園，呎價企硬亦多得當年有heart的超人。
相比之下，近數年長實出品、件件絕品，點解堆填區心曠神怡、點解發水發到盡，今日借用黃子華「係啦定律」同「好呀法則」，希望大家能對長實盤放下成見，多些豁達、多些諒解，以後記招有人問點解，樓神老趙不妨採用。
點解天宇海五樓變一樓？係咁㗎啦，點解玨堡天台冇圍欄，隨時跌落街？好出奇呀。對長實有多點了解的朋友可能會知，小超李澤鉅一向計到盡，所以新盤窗台可以打保齡、斜壆窗台可以瀡滑梯，答案只得一個，係咁㗎啦，之但係佢個老竇又會唔理喎，好出奇呀。
人是犯賤的動物，股榮亦不例外，每個周末，股榮都會落樓沿荃灣西鐵海旁跑步，由麗城跑到海濱，每次明知由碼頭開始到海濱有惡臭，都不會掉頭走，反而死死氣加快腳步經過。原因：係咁㗎啦。還有更多釣魚發燒友在碼頭釣泥鯭，釣上嚟時仲大大聲話好大隻好肥，咁臭都頂得順，好出奇呀。
■長實環宇海灣快開售，準買家千祈要實地直擊。
樓價低水總有因由
剛過去周五晚跑步，有經紀聚集在海旁一帶撈客，股榮休息期間，AA立即sell盤，被問到點解咁臭時，經紀話潮退時先係咁，改善渠道工程就展開。其實，解釋即是掩飾，下次不妨用「係咁㗎啦」來回應，就如陳奕迅冇退地圖片一樣萬能key，好使好用，買家倘若真係buy，好出奇呀。
經常有人問，點解那些區或某發展商樓盤跑輸大市，或者某些樓盤開價特別筍，要知道，低水總有低水的原因，著數價不會無緣無故給你的。《蘋果日報》寫字樓較日出康城更接近堆填區，聞到的惡臭更甚。收到部份康城的業主投訴，說《蘋果》經常唱衰，令樓價積弱，但捫心自問，大家買樓前，是否應做定功課，實地考察呢，如果因為價錢吸引，而犧牲環境，就不要怨天怨地，因為事實是「係咁㗎啦」，樓價跑輸同區，大家心照，好出奇呀。
股榮
上一則: 投資導航：五窮六絕月港股難捱
下一則: 【青談3分鐘 】阿信屋多火頭芝士麵冇義氣冇得嬲
趣BlogBlog - 股榮 舊文