趣BLOG BLOG：財演被碌爆卡值唔值得？ - 股榮
■借用葉劉金句送給各位專欄作家，「人講你就信？咁大個仔！」
約三年前，寫過一篇題為〈財演指數股 中伏機會高〉的文章，有興趣朋友自己按回以下網址重閱，http://hk.apple.nextmedia.com/financeestate/art/20111030/15753378，今次再寫，統計了今年4至5月份，合共34個交易日的十大升幅及跌幅榜中，被專欄作家、財經演員當日「寵幸」的數據。
大升或大跌約三七之比
由於每日升跌榜中，部份股份成交額只有數十或數百萬元，散戶參與程度明顯不高，因此今次只計及大額成交的大升大跌股。合共680隻股份中，只有約13%(89隻)，成交超過1,000萬元，升跌幅榜分別有53隻及36隻。
股榮用慧科搜索(WiseSearch)協助，89隻活躍大升大跌股中，當日獲財演在全港主要報刊及雜誌點名唱好的，共有33次。即推即中招、打入十大跌幅榜共有23次，佔比七成；至於有眼光貼中十大升幅榜的，則有10次，機會率三成。
表面上，數字代表了，大家跟財演買股仔，買中大升或大跌的機會約三七之比，再細心分析，其實23次即推即瀨嘢個案中，只牽涉到12隻股份，原因是當日股價暴瀉之時，巧合地有兩位甚至三位財演齊齊吹捧，股份受唔起如此祝福，即推即死。反觀10隻點石成金的推介，無一財演重複，好運成數頗高。
曾淵滄教授上周提及，「星美文化(2366)上周三急跌，想來想去也想不明白，近日此股明明同時有多位股評人一齊推介，為甚麼會大跌？難道有人真的想坑害這麼多股評人？目的何在？」上周三星美瀉37%，同日有三位專欄作家推介(不包括教授)，理由不外乎貨源歸邊、價殘值博、供乾好炒，結果真係攬炒。
面係人哋畀架係自己丟
經常鬧股民聽完冧巴唔做功課，但畀冧巴的人有冇責任呢？作為財演，股榮認為不能推卸。財演的信用度每況愈下，被網民嘲笑，其實只是自己整死自己。當然，股民買賣，最後的決定權是在他們那裏，他們要為自己的行動負責，不過被騙多一、兩次，財演的信用會破產，無論你以往推介有多好。
很多時，莊家或有心人會同財演搭膊頭、食餐飯，然後叫你美言兩句，看起來無傷大雅，又畀到人情。但要記住，面係人哋畀嘅，架係自己丟嘅，被人抽完水利用完，自己的信用卻被碌爆卡，值得嗎？以往網絡未發達前，出了事可能只有行內人知道，但在資訊氾濫的年代，網民真的會起你底，隨時一Q清袋。
借用葉劉5月初對張炳良的金句作尾，送給各位專欄作家及自己，「人講你就信？咁大個仔！」
股榮
上一則: 投資導航：世界盃年股樓當黑
下一則: 【青談3分鐘】大陸妹唔係女？港女先係高級貨！
趣BlogBlog - 股榮 舊文