文亮言 - 湯文亮 2015年7月12日
【文亮言】總理暴力救市為國民開啓逃生門（湯文亮）
不少人話總理暴力救市，我覺得總理用力恰到好處，雖然力發千鈞，但又沒有人為此而受到重傷，而總理救市的目的，是為國民開啟一道逃生門，希望那些受到重創的股民就算未能收復失地，最少都可以半身而退，不過，世間事，不如意者十常八九，事情的發展又非如總
理所想像，不少股民見股市反彈，便加碼投注，不但希望收復失地，更加希望闖高峯。
他們其實是曲解了總理好意，以為股市再下跌，總理定必再暴力救市。這種想法是錯到無倫，今次若果不乘著總理開啟逃生門逃生，它日股市再下跌，總理就必定不會再暴力救市，甚至不會救市，那些股民就不能怪國家。所以，唔識利用這個逃生門逃走，他日就注定走唔甩。
一定會有人話我錯，這反而會令我覺得很奇怪，唔通有國家領導希望自己國民炒股而不事生產，強如美國，炒股的人其實不多，他們會買基金，由基金經理替他們炒，日本人則買那些什麼生命，即是保險公司的債券，就算是香港，炒股的人其實不多，如果有足夠資金，不如買樓收租，不過，股票評論員就很多，報紙又廣泛報導，又有很多花邊新聞，我當娛樂新聞來睇，都幾有趣味性。
反而祖國就太多人參與股票投資，上市公司的消息又唔準確，全靠那些大媽式評論員指點文章，不過，國內股民亦不太理會，他們一係睇國家政策對股市影響，一係睇都唔睇，勇往直前就算數，不但各大城市的市民參與，甚至各鄉鎮都有無數開放式股票投資地方，那些鄉鎮居民終日無所事事，最初以炒股為樂，現在則以此為生，股市下跌，就立刻有人要生要死，每一次國家領導見到，便立刻救市。
在總理暴力救市之前，又降準，又減息，都唔知救咗幾多次，連養老基金都用來救市，但愈救愈跌，那些炒股票的人又唔願意離開巿場，而主席在較早前去過澳門之後，知道賭場將磨穿席賭仔列在必輸排行榜第一位，除了立刻收緊公務員去澳門的政策外，仲話俾總理知道，那些日日炒股的人，長賭必輸，所以總理趁今次股市大跌，暴力救市，亦即是警告班股民，只此一次，下不為例，所以我話總理今次暴力救市是為各位開啟逃生門，大家千祈唔好辜負總理一番心意。
文亮言 - 湯文亮 舊文