【不問價追】牛市資金部署（小炒王梁心欣）（第86期）
2016-8-20 18:00:10
呢期俾人問得最多嘅唔係「冧巴」， 而係資金點樣運用。一去到「牛市」就算多多錢都唔夠你使，即使係四叔持有的基金都唔會夠錢用！（人哋有成過千億）同一個問題小炒王都經常遇見！
好早已經叫
咗你哋唔好「全職炒股」，平時返工等多啲錢可以滾動， 有儲蓄有贏來備戰，咁就唔使頭痕。不過咁，依家追究都無用，因為牛市已經來到，呢隻買咗落去唔升，而第二隻爆上去，係咪好肉痛呢？呢種叫做「機會成本」。好簡單等我解釋一下，例如你得十萬蚊，好似上個星期咁，你將佢買落安徽海螺水泥（00914.HK），結果隻914唔多鬱，但係隔離隻中國平安（02318.HK）就升到嘭聲，呢一刻你只會怪自己當黑，又或者邪童上身，其實根本唔關事！
呢一刻你就會諗如果有多一嚿資金買落平保咁我咪會雙贏囉，當然啦，最簡單嘅方法就係借孖展，咁你就可以槓桿多幾倍落去，但同樣你幫緊經紀同證券行打工，又畀息，又驚俾人call孖展，久而久之你會好唔安落，甚至自怨自艾。所以，如果你嘅資金唔多，其實都有另一個嘅玩法。
既然個市咁旺，好多貨我都會坐過夜，之後第二朝一高開就即刻出咗佢。
小炒王嘅玩法係咁，既然個市咁旺，好多貨我都會坐過夜，之後第二朝一高開就即刻出咗佢，（你會話：升就梗好啦，係咪一定升？）我敢寫包單，就算升你都唔走，因為貪心係人之常情。但呢一下，最緊要放開自己來對戰，試諗下，嗰一隻貨噚日尾市谷咗上去，第二朝通常有力再谷，之後就好容易出現沽家食胡，隻股自然會回調。
換咗筆錢返出來之後就可以部署第二隻，因為通常第二日高開嗰隻亦都有機會回調，一調落去，就部署再執返。（正所謂好嘢唔怕買返）呢個時候我自己會扮勁強者衝入去，當自己係大戶沖一浸，又可能食咗個靚價位。近排好多人都不斷問有咩平嘢、有咩追落後？講真，千祈唔好搞成交淡薄嘅，追最落後的，就好容易中計。
仲有，最多人問點解我隻嘢唔識升嘅？點解嘅？其實要搵隻識升的，一定係有故事、有憧憬、有原因，你揀錯嘢咁就最弊啦！所以呢一期最緊要係識得變通，唔好再用一啲守舊嘅方法來炒股票，因為你就算係揸咗大藍籌，你就決定長揸，而另一部分的資金就要靈活運用，變通得快咁你先至會成為牛市嘅大贏家。
記住好好把握呢一浪。
不問價追 - 小炒王梁心欣 舊文
來源 source: http://www.winmoney.hk