【不問價追】 冇肉食的深港通？（小炒王梁心欣）（第87期）
2016-8-28 18:00:07
宣布深港通後，係咪好難炒呢？由6月叫大家建倉，話基金儲貨， 「勸」你點都買啲，直至8月中，係咪感覺良好呢？起碼由20000點附近買上23000點，收穫頗豐。唏，且慢，你開初
就話難炒喎，邊句真呀？
小炒王維持10月不炒股論調，有咩10月前搞掂，等新一任美國總統正式登場先再作部署，咁究竟點解？呢個可以下回分解。今日想講嚇，咩為之升浪，2016年中呢次又算唔算大浪呢？
在每個升浪的初段，小炒王都在餐廳、電梯等不同的場合，聽到別人紛紛講現在的股市風險好大，賺一點點就離場好了。又有不少人，對於多年蟹貨終於見到家鄉而感到非常雀躍，及早鬆綁走人。投資者還會對股市小心翼翼， 證明股市未完全瘋癲。蟹貨死守多年終見家鄉固然難得，但既然你手上的股票已經超越歷年大位，反正早已持有多年， 現在可以返家鄉，甚至有機會倒賺的話，只賺一個幾毫或者一千幾百元就「急急腳走人」，似乎又未免太心急。通常出現以上情況，我都叫自己放心進場。今次呢浪正正係呢個情況！
有時民間智慧的確好準，當四周的人都在講股票，就要提高警覺，不要以為連大廈保安、清潔工人（絕無歧視成份，純以藍領作例）都賺錢，你入場也會必贏。其實他們也有個人的投資智慧，最重要是學懂分析別人的說話內容和心態。這時你就可以把握機會識得走位，觀人於微也是一種智慧。
咁好啦，遇見升浪卻無貨在手， 的確慘過輸錢，但假如我叫你在某個位追，你沒有買，等到股價升了50% 至80%才追，後果只會更加慘烈。因為股價在幾日內大升，自然會在高位來來回回，令人心驚膽跳，跌少少都怕高追。當別人不斷出貨，你卻不斷接貨，最終就一手蟹貨。別人膽大， 你就心細；別人心細，你就膽大，很難會贏到大錢。所以，麻煩大家在買貨之前，看清楚股份的狀態，才決定是否買入。就算我送了「冧把」給你， 你卻買位「唔靚」，時機一錯，你一樣要捱，到時候怨都無謂。小炒王絕對不希望大家有如此經歷。所以在時間掌握上，很視乎你的執行能力是否夠強，會否快狠準做決定？能否靠股票賺到第一桶金，也是取決於你拿捏入貨和出貨的藝術。
不過，當有些股份被人斬倉30% 至40%，小炒王就很少接盤，因為每次斬倉，對一隻股份都有很大傷害。所以搞唔清楚，到底是孖展被人斬倉， 還是有人「走佬」被人斬倉的情況下， 我絕對不會撈，也會提醒自己，少賺一轉不會死，多輸一鑊就好「甘」。呢期好多人面對大市都好迷茫，甚至亂衝入斬倉股，以此為戒，將來的股票路會更好走。
不問價追 - 小炒王梁心欣 舊文
來源 source: http://www.winmoney.hk