【實力取勝】我信蘇民峰的港股華麗轉身預言（陳承龍）（第90期）
2016-9-18 18:00:32
執筆之時，正正是周一恒指大跌超過800點，老實講，當日小弟有在社交平台叫大家撈底，理由很簡單，美國加息是遲早的事，但突然在高位才將此因素放大，明顯是大戶有心質低，目的就只有
一個，震倉。講真，美股在總統大選前都未必會大死，至於港股，老實說，即使給你在恒指20000點咁叻撈到貨，我估計你22000到23000點已畀返曬佢，即使23000點樓上有追貨的，都是大大聲細細注，所以我唔覺得個市玩完。
當然，你會問，咁今次恒指升超過4000點會是返個買上嚟?我可以肯定不是我等散戶，從數據顯示，包括中央結算的數字可見得，主要是內地資金及外資大行，內地資金從港股通每天的餘額已可得知，至於外資大行，近期都在中央結算的數字見到他們的蹤影，所以都幾可以肯定他們在過去的升浪中正在建倉中，而周一的大跌市，我唔相信佢哋可以出到貨，不排除他們更反手加碼。最重要的一點，目前仍未見全民皆股，一般散戶依然好驚，高位又不敢追，不過大跌又不太敢撈貨，這樣的市況通常都未玩完。
老實講，大家係咪覺得我好樂觀?係！我都覺得自己超級樂觀，不過，實在太多原因支持小弟繼續樂觀落去，第一個原因就是蘇民峰。尤記得去年舊曆年底，我們搵了蘇師傅訪問點睇今年個市，佢講過，今年下半年個市會有個華麗轉身。喂！中咗喎，自從6月底英國脫歐公投，整個股票世界都有很好的表現，而師傅話明會好到明年，掂呀！
第二個原因，就是我引用多時的十年周期理論，即逢7嗰年先見頂，1987年、1997年、2007年，幾個7都出現股災，但出現股災之前，個爆升力度之大及速度之快，是相當驚人，而近期的升市都屬不慍不火，慢火煎魚格局的上升，所以仍屬健康水平。
第三個原因，幾隻重磅藍籌股仍然有大升的條件，尤其係匯控（00005.HK）和騰訊（00700.HK），前者嘅回購盤，足以繼續推隻匯控上，而騰訊，根本無法知道其前景可以有幾遠，因為實在太勁，因此基金焗要買貨。仲有，隻長和（00001.HK），我唔信霍建寧咁樣增持法唔會冇料到囉！對上一次霍建寧增持和黃後，股價最多升過5成，所以佢今次咁樣增持一定有嘢。幾隻我睇好嘅藍籌都仲有條件升，咁無乜理由個市冇得升囉！除非內銀內險全部死曬。
仲有一隻，金沙（01928.HK），我非常睇好，原因好簡單，上次金沙開金沙城後，股價就升唔停，而今次巴黎人開張應該有睇頭，尤其對外資而言，鬼佬淨係會買金沙，因為佢哋識嘛，如果呢隻龍頭成到勢，絕對可以帶起其他濠賭股。最後一個原因，就是有深港通，據我一位朋友的內地親友講，佢哋堅對港股有興趣，所以呢股北水絕不能忽視。總括而言，港股大時代今次真係返嚟，一見到心頭好到自己嘅想買嘅位，真係唔怕收集，之後必定有不俗回報。
實力取勝 - 陳承龍 舊文
來源 source: http://www.winmoney.hk