【不問價追】11月是生是死？（小炒王梁心欣）（第96期）
2016-10-30 15:00:36
睇開「不問價追」專欄的你，應該知道小炒王對於10月嘅睇法，傾向保守。一來驚重蹈覆轍，又遇上股災月，二來美國總統大選前，我都傾向淡啲，因為驚會遇上「黑天鵝」，以免年頭儲落的糧
餉，年尾來個一鋪清袋！
10月的估計，準又唔算，錯又唔係。恒指處於上落市，買咗又要等，唔買又身痕，咁11月等到美國總統人選塵埃落定啦，又係咪出手的時機？咁專業，梗係搵啲股友傾幾句。
做投行的Cindy，一知道我問美國總統邊個會贏就話我多餘。
Cindy：「我哋睇完三場電視辯論，就知道希拉莉嘅勝算大增，再睇埋博彩公司賠率，特朗普有成4倍幾，咁答案顯而易見。呢樣都唔係我哋嘅討論話題，我哋比較關心到時邊個做眾議院和參議院的議長多過誰是總統。因為基本上邊個做都影響唔到我哋現時嘅投資決定。」
我：「咁即係話，你哋幾可否定到年尾都唔會出現黑天鵝事件？得返11同12月，除咗美國加息係大件事之外，其他係咪都平穩度過？」
Cindy：「年尾前，油價都會平穩，之前憂慮同油價掛勾的債券都唔會爆煲住，金融機構得以喘息，睇唔到有咩會拖垮大市。仲有就係量化寬鬆持續，基金啲錢根本無路可逃，唯有繼續留喺美國。」
Cindy仲話出年繼續買高息股份，同埋認真諗下菲律賓有咩好股。內地方面，都係政治問題大於一切，呢個係佢哋比較擔心的要素。其餘甚麼人民幣貶值、內地樓市崩盤、股市停滯三千點通通都唔係考慮的原因。佢叫我炒住上落先，明年先會見真章，儲定筆錢，唔好炒輸，2017年先係真正的競技場。
聽完佢咁講，小炒王都幾放心，因為諗住11、12月都會比較勇少少，發掘多啲機會，如果恒指力衝24300點，就大膽啲部署啦。
不問價追 - 小炒王梁心欣 舊文
來源 source: http://www.winmoney.hk