不問價追 - 小炒王梁心欣 2016年11月13日
【不問價追】深港通急call（小炒王梁心欣）（第98期）
2016-11-13 15:12:27
經紀：「喂，梁小姐，你好耐冇鬱過個戶口啦，係咪唔記得咗？」
我：「唔係，我少咗trade，唔啱所以冇買賣。」
經紀：「其實大市okay呀，你可以買返密啲。」
我：「我注意下。」
真貼心，唔知從何時開始經紀們會搵返啲舊客叫佢哋trade下，可能我用銀行戶口較多，所以好少收到呢類型電話，唔知大家有冇收到呢？唔通深港通就快通，經紀要搵舊客傾傾偈，打好關係？
其實都係開場白，我估計深港通通車日以11月21日或11月28日為先，原因是中國人吧，如果11月14日開通，實X、實X唔多好聽吧，亦都唔容易記，所以11月下旬開通機會最大。上半年，大家都有一絲冀盼，認為深港通會帶動成交，帶旺股市。不過，第四季經歷過美國總統大選、人民幣貶值、香港樓市辣招等等不安事件後，早就將什麼刺激股市因素拋諸腦後，所以阿爺今次控制預期控制得好好。
點解咁講？大市由9月尾開始靜過鬼，段段落、段段表現差過預期，好多散戶手上一批蟹貨，根本冇多餘錢再進市場。中學讀書都讀過：「一鼓作氣，再而衰，三而竭。」上半年講到深港通有幾勁，但等了又等，再唔起撈，盞原本部署的投資者都走曬，咁到時大鑼大鼓都冇用。要小炒王再講買咩，你可能覺得悶，都係嗰句，中、港資券商股走唔甩，自己偏愛中信證券（06030.HK）、中國銀河（06881.HK），（已在新城財經台的上午策略王叫大家儲定）至於本地證券的炒味比較濃，我主張到時跟勢為主，唔需要儲定。
港A股繼續睇唔夠50億市值的李氏大藥廠（00950.HK），（詳情睇返早前的文章）今周開始有聰明錢買入，科技亦絕不可少，11月下旬希望大市復活，大家打醒十二分精神，唔好錯過。
不問價追 - 小炒王梁心欣 舊文
來源 source: http://www.winmoney.hk