【不問價追】2017時間表（小炒王梁心欣）（第103期）
2016-12-18 15:00:39
2016年被一言驚醒，心裏面依然相信逢10年一個大浪。1987、1997、2007、2017，每次經歷10年，總有一波巨浪，但時機如何把握，贏咗要幾時走，輸咗又點樣補底，試
睇下呢個時間表啱唔啱使？
有大起必有大跌，上帝要你滅亡必先令你瘋狂。照睇2017年美國總統特朗普上場，外圍繼續「立立亂」，歐洲各地大選，中國經濟是否有轉好跡象，人民幣繼續貶值定企穩？一大堆問題湧上心頭都唔知點處理。因為有時大市好得意，主要係資金推動，有錢，哪怕政治、經濟未有改善，只要「春江鴨」一到，跟勢的話，隨時改變命運。
來到年尾，就大膽一點預測。喺農曆新年前大市依然呆呆滯滯，但細價股先行起動，帶旺整體氣氛。及至二月尾開始，資金湧來，大價股如夢初醒，猛烈追趕，三、四、五月將會係炒股佳節，可能指數上到意料之外的數字。當資金確信買入，及至六、七月，理應萌生去意，縱然大市依然暢旺，但個人要有極好操守控制住自己，安心放下。八、九月乃動盪之時，十月將會大勢去矣，十一、十二月將會不值一提。係咪好似玄學論市呢？其實唔係，係經過計算的結果，十月出現股災不足為奇，每年六、七月遇上轉勢亦都係等閒事，所以大膽預測、小心求證。現階段，最緊要現金充裕，方便2017衝、衝、衝。
以上純屬個人睇法，無話對與錯、準與否，最緊要贏要去盡、輸要縮盡。2016難炒之年快將結束，正好為2017做好準備，聖誕之期不宜積極炒作，共勉之。
不問價追 - 小炒王梁心欣 舊文
來源 source: http://www.winmoney.hk