【不問價追】準備好披甲上陣（小炒王梁心欣）（第105期）
2017-1-1 16:00:09
咁又一年，相信好多戰友喺2016年都大叫辛苦，一年好炒嘅月份少之又少，買10隻輸8隻嘅月份就多多聲，你都咪話唔難炒？做淡做好各有支持者，做淡係咪一定贏？咁又未必，做淡好多時都俾人挾
，識得兩邊走左右逢源嘅戰友真係少之又少，做得到真係要俾個讚。
上回提到小炒王去到澳門視察下當地嘅經濟環境，結果深深感受到內地人對當地嘅經濟影響力。我首次乘搭直升機直飛澳門，係機上面都遇到內地人，證明佢哋經濟能力相當。咁究竟一程直升機飛去澳門要幾多錢呢？答案係4300元。值唔值或者抵唔抵？因人而異。但難得係飛行嘅經驗兼且15分鐘之內到達澳門，感覺相當之爽。本來，我話會講下直升機嘅航行前景，查查下我發覺原來有極多數據係背後，咁我花多啲時間睇清楚啲先至同大家詳細報道。總之一句講曬現時何鴻燊先生有份嘅直升機業務每日都蝕緊錢。
早排寫過2017嘅股市時間表，預測股市走勢係先高後低。同好多身邊嘅戰友商討，有部份都認同，但我心諗個個都估中的話，「市場先生」係咪會咁乖呢？答案梗係唔係啦，通常估錯嘅多，估中嘅小，所以到時都係亦步亦趨。咁不如趁著美金強勢走去抖下玩下啦，事關歐元、日圓等貨幣都貶值，出外散心簡直係不二之選。但對於經常喺市場活動嘅戰友來講，出外旅行絕對係大件事，一嚟驚個倉太full，去旅行睇唔實；一係就驚個倉冇貨，遇上市場大爆發就得不償失，結果好多全職炒友都唔敢離開個時半步。
小炒王在此奉勸各位戰友2017年都係唔好行開行埋，最好睇實啲，萬一遇上10年一轉大好機會，錯過咗就真係冇仇報。特別係春天夏天啲時間最好都係留守大本營，秋天冬天出走反而有著數。希望今次冇估錯啦。睇返少少數據，係冬至假期只聖誕期間，我哋見到滬股通流入的資金逐步增多，內地大戶慢慢吸的趨勢形成，各位千祈唔好急，忍耐地等待下一浪先係王道。
不問價追 - 小炒王梁心欣 舊文
來源 source: http://www.winmoney.hk