【實力取勝】2017年 上帝要你滅亡先必要你瘋狂（陳承龍）（第105期）
2017-1-1 14:00:40
話咁快2016年就完結，回顧2016年香港個股市，老實講，一啲都唔易玩，尤其上半年，簡直死水一潭，係直到英國脫歐公投後，反而先至有返啲生機，恒指由19xxx點開始抽升，直
到9月，最高見過24200點水平，如果捉到，咁就4000多點水位。雖然之後有調整，殺到現在22000點的水平，但期間都有不少好股落鑊，先有今年小弟的重中之重的滙控（00005.HK），由年中的53元水平已叫上車，即使之後在57元至60元之間，仍不遺餘力狂叫上車，即使恒指依然有調整壓力，但滙控也曾高見67.3元的近年高位。
如果睇返滙控幅圖，雖然幾次都令大家懷疑究竟滙控是否能再升，但最終在幾番震盪下，仍依然能試高位，即使在回購完成的因素下，該股由高位回落了不少，但小弟依然相信滙控將會是下一個大浪的股王，不要忘記，即使回購完成了，但其ROE(股本回報)提升了，基金最終只會睇數字做人，焗買。更重要一點，自英國脫歐公投後，滙控的走勢已完全轉勢，擺脫了過往的弱勢，所以該股逢回吐吸納將會是2017年的定律。
如果2016年揸重一隻滙控已經有不俗的回報，但其實有不少板塊已靜靜起革命，例如資源股，這些舊經濟在特朗普贏了美國總統後，已開始轉強勢，例如一批鋼材股，不少已升至近期高位。事實上，2017年最大的變數，就是全地球多個國家換領袖，除了美國外，連香港也換特首，在換領袖的過程中，會對不少行業也帶來些變化，例如新官上任，通常都會大搞基建開支，以刺激GDP，所以一批資源及原材料股突然受惠，同時也符合周期性因素，這個板塊已經歷了幾年的低潮，是時候進入一個需求上升的周期，因此這板塊也是2017年逢回吐吸納的對象。
至於小弟最鍾愛的濠賭股，在2016年，講堅，是最難玩的板塊，2016年第2季，我們已在新濠影匯開業後，就叫大家上車，嗰個位就最靚，基本上由嗰刻揸到依家都唔使輸，仲有得贏，之後在9月中，即金沙（01928.HK）旗下的巴黎人開業，我們又叫大家上車，呢轉上車都算舒服，就以金沙為例，一叫上車，大概在34元水平叫上，雖然期間震到落去33元水平，但之後持續上升，最終也能上 39元的近期高位，可惜，高位Keep唔到幾耐，在近兩周，因銀聯ATM提款受限制的因素，即拖低此板塊，金沙更由高位殺穿9月的低位，大上大落之餘，調整速度之快也令人吃驚，不過小弟唔會咁易畀佢哋嚇親的，小弟依然認為，澳門賭業已經見底，而且澳門依然是內地合法走資的其中一個重要地方，所以濠賭股無理由唔受惠，難得近日調整，小弟認為不失為低吸的良機。
總括而言，2017年會是一個機會年，正如小弟在過去一段時間經常提及的10年周期理論，2017年正正是今個10年周期的高峰期，記住，今年會是大時代又會是股災，上帝要你滅亡前，會必先令你瘋狂，所以2017年上半年好可能會炒得幾癲嚇，尤其啲股仔，2016年第4季，已有不少股仔做了熱身動作，你哋㩒得最多睇嗰啲呀，例如275、1051、619⋯⋯。總之，要識睇位，下半年高位就唔好亂追，殺落嚟嗰嚇，可以好恐怖㗎。
實力取勝 - 陳承龍 舊文
來源 source: http://www.winmoney.hk