【不問價追】遊走衍生工具之間（小炒王梁心欣）（第113期）
2017-2-26 13:00:03
近來市旺，除咗用指數同埋成交去衡量，我上一篇專欄《不問價追凱升》成為咗過去一年點擊率最高嘅專欄，（是小炒王在《港股策略王》個人紀錄）在此先多謝大家捧場。亦因此證明，大市向上漸
見動力，大家對「冧巴」的需求大增，咁，何來供應呢？
最直接梗係睇專欄同埋睇節目啦，一個”Number”隨時令人如癡如醉，不過聽”Number”之前都要了解下自己先，正如你拍拖都想了解下另一伴以及了解下自己，究竟你同佢啱唔啱架嘛，就算”Number係好，但唔識操作，一樣打橫被人抬出場。就好似你點個A B C餐咁，你都會衡量下自己想食乜嘢邊樣啱自己胃口。咁揀一個”Number”的時候你同樣需要考慮自身嘅因素。
恆指上到24,000點水平「大價股」先行，就算小炒王叫你買細價股你都唔會掂啦。道理如曹Sir 所講，「最緊要有勢」，跟勢而行絕對是大道理。大價股勒住嘅注碼比較多，令到個倉位靈活性唔夠強，走動唔到。所以好多時大家都會以衍生工具傍身。咁選擇衍生工具嘅時候應該點樣先至知道係咪啱自己呢？
小炒王對衍生工具都係門外漢，過去炒股十年左右，每年都有幾個月玩衍生工具，但你話係咪好「精」呢，咁又唔算。不過小炒王非常之緊貼市場，呢個係一大優勢。如果你係返朝九晚五工，又有老闆望得你好實，咁操作衍生工具就會係一個障礙。好多朋友連價內定價外都唔知，引伸波幅、到期日更加係完全唔知乜嘢一回事。如果你屬於呢類人衍生工具都唔啱你，你定必要學習基本知識先可以投入呢個市場，因為你連入場券都唔買，你夾硬入來玩就即係等「實Q」帶返你出場，何必呢？
接受風險能力要高！呢段時間小炒王心口都有個勇字，衝出衝入已是慣常動作，但買了衍生工具的話都會加倍留神，因為正股上落1%，衍生工具隨時是幾倍波幅，唔望實又點得呢？買牛熊證一係贏曬一係蝕曬，但你心裏都有個預算，贏輸都係個本金，唔使額外補落去，亦都適合某類投資者參與。我個人就比較鍾意選call輪，好少做淡倉，睇淡開put 人生只做過五次唔夠。
淡定同埋資金在你預期之內的，相信買賣衍生工具都會舒服好多，同埋唔好再問衍生工具有冇目標價，因為睇目標係睇正股，點可能俾到目標位你？如果你份人係快、狠、準的話，買正股再加衍生工具都唔會有太大問題，但你成日心大心細做唔到決定呢？衍生工具對你來講可能加重你負擔，唔去止賺止蝕更加係買賣衍生工具最大的壞習慣，因為佢唔會等人，動作夠快先可以遊走衍生工具之間。
不問價追 - 小炒王梁心欣 舊文
來源 source: http://www.winmoney.hk