Can Bank：打到嚟買咩好？
■北韓在剛過去嘅太陽節發射導彈，令國際局勢進一步緊張。 資料圖片
美國呢頭向敘利亞發射導彈，轉個頭又向伊斯蘭國投擲炸彈之母，突然之間全球火藥味極濃，更有吹到嚟亞洲嘅勢頭。
北韓在剛過去嘅太陽節發射導彈，雖然失敗但卻成功令到國際局勢進一步緊張，
美國總統特朗普尚未表示或真正履行「世界警察」嘅角色，中國亦未表態，而最受影響嘅南韓反應最大。
事隔幾日，美國一直都未向北韓發動攻擊，相信除咗係因為未得到中國應承幫拖之餘，亦都驚中國係企向北韓一邊，貿然發動攻擊隨時變第三次世界大戰，即使打得贏，代價亦非常大，在美國內部局勢未去到失控需要轉移視線之下，咁樣「宣戰」，成本明顯過高。
中國方面，從韓戰起一直係朝鮮（即係北韓）嘅盟友，雖然情況在金正恩上場後有改變，但可以肯定嘅係今日嘅中國未必想開戰，不過面對美國紮行個馬，為局勢安全著想，中國有可能會暗地裏幫北韓拖。
總括而言，今次大打出手未必會，大家show下有咩軍備絕對有可能，上次數過一下美國軍工股，今次要數下中國嘅軍工股，如中航飛機是中國唯一轟炸機生產商、北方導航為中國兵器工業集團旗下，以及軍用衞星導航主要供應商航太電子等。至於港股本身冇乜軍工股，但資金避險之下金股會受惠。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com