收市閒情：
盜亦有道撼Batman
■Batman份沽空報告只係「Part1」……故事完未？ 資料圖片
江湖上正邪各路，陰謀不斷；往往為奪經搶劍，不擇手段，爾虞我詐。正當阿里、順豐為爭奪《九陰真經2017－大數據》一戰，以獎門人方式打和落幕之時。香港一邊廂，正展開一場「空軍大戰」，史
稱「圍剿Batman」。
一切都要數到上個月初，瑞聲（2018）堂堂藍籌新貴，股價平步青雲，又點會估到有一日走出一個Batman唐唐，大叫「你呃人！」喂藍籌呀，Blue Blood呀，你話我篤數？「你你你先呃人呀，我告你，各位『股來』，大家唔好信『虛假市場情情情侶』」
眼見瑞聲嚇到當堂口窒窒，Batman滿意地笑了，「Oh！真的嗎？」然後揮一揮鬥篷，不帶走一片雲彩，你以為啦。
事隔半月，瑞聲已由110蚊水平，跌到去90蚊邊，戰況係慘烈，屍橫係遍野，但正謂一仗功成萬骨枯，戰場開始有聰明錢走入去，踐踏著骸骨搵食，而90蚊似乎跌定了，至於Batman亦認為時機成熟了：再出報告，仲要係詳細版！
「瑞聲呀瑞聲唔好怪我不仁，我事前已出咗Preview版作警告，點知你又以為我冇料到，要怪就怪自己唔識趣，喺我出詳細版之前停牌咪冇咁傷囉。」結果呢？就是傑了。瑞聲再狠插到得返81蚊之後落閘但唔放狗，停牌吹雞完場。
事隔半月，場外圍觀嘅戰友都屏息靜氣，食住花生等好戲。大家都知瑞聲一定反擊，但到底都估唔到佢使出江湖上最毒嘅一招，叫「以毒攻毒」。即係咁，你話有咩光環勁得過，畀一個出名毒舌嘅人讚呀？
「Batman，我閱股無數，出名殺股於無形，但肯定瑞聲係好嘢，你插佢係因為你唔識嘢！行開啦，不入流！」有世界級Hacker組織背景嘅匿名分析，今日竟然擺出一幅盜亦有道嘅姿態，做瑞聲架兩，最勁嗰句係，「我嗰時同行家都夾埋想沽空瑞聲呀，但發現條數係堅勁！你唔知咩？Sorry呀，總之你睇跌到40蚊，我就睇升到110蚊。」。
說時遲那時快，瑞聲出公告開記招，搵埋「行政總裁外婆兄弟的兒子」出來澄清，黑白兩道，同時夾擊，「Batman呀，聽日復牌仲唔挾死你。」
一間瑞聲，掀起江湖一片腥風血雨。大家或者以為今次Batman棋差一著，但唔好忘記，Batman份沽空報告只係「Part1」。欲知後事如何，且看下回分解，難為正邪定分界。
千頌C
http://www.fb.com/winbigwok
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
千頌C
收市閒情 - 千頌C 舊文
來源 source: http://hk.apple.nextmedia.com