摸魚手劄：買年金者是豬
■年金的推銷比其他產品更難，那是因為參加計劃的人要先付出。資料圖片
友欄徐家健教授以諧趣方式調侃年金，類比倫敦金，題目有趣，我可以補多幾筆。先把結論講出來：買年金是傻豬豬，買政府的年金冇咁傻豬，但本質上都係豬。先講一個故仔：
退休人士大明有一筆退休金，然後參加
了年金計劃，定期派錢。剛好兒子小明要結婚，可惜無錢買樓畀首期，退休金又用來去買年金，大明只好抵押自己居住的唯一單位套現，每月還款。好景不常，剛好遇上加息周期，還款壓力增加，年金派息追不上生活成本，加上小明又要供樓，大明只好出山做嘢。退休人士久未復出，重新工作固然辛苦，慘在積勞成疾，比預期壽命更早死，然後年金計劃正式玩完。
留意推銷者有否身體力行
如果你係專業投資者，你會條件反射把年金當成投資品去睇，然後計回報率睇yield，然後去對比收息股，睇銀行定期派息，開始計一些百分比的死人數學，然後……你就開始中計了。收息股、銀行定期、債券等投資品和年金不同，是一開始你付出的本金，未必到最後好像股票、定期、債券最後拿得返，有相近流動性。因為年金的設計本質係對賭你條命有幾長，所以男士和女士的回報各不同，因為預期壽命在模型的變數計算也不同。除咗長命，也要祈求上天你冇病冇痛，子女要生性，否則你要調動大筆資金就GG了。
一般人分析年金係簡單地計比回報率的percentage，然後估自己有幾長命，而忘記人哋背後係有一隊專業精算師運算同你對賭開盤。所以，你要問的問題係：你有冇方法在這班精算精英前鑽空子，計贏佢哋？年金的推銷比其他產品更難，那是因為參加計劃的人要先付出。行為經濟學有一個概念叫loss aversion，先付出的痛，大於收定息的良好感覺。同樣的問題，也發生在逆按揭上，所以這些幻想以投資產品包裝成退休產品的計劃比較難推銷，就係咁解。
當你面對一些看似極度複雜的情境或投資產品，有時不必想太多，我會建議回歸街頭智慧，用最簡單的檢視方法，就係睇推銷的人身體是否誠實。推銷大灣區的權貴，根本就不會把資產、業務重心轉去大灣區，口裏說愛國的人個個都有外國護照，做好隨時著草的準備。大家不妨睇下設計、推銷年金計劃的人會否身體力行，自己落場，叫埋子女親朋一起去玩，咁你咪知年金有冇料到囉。
渾水
專業投資者、上市公司執行董事、90後
http://fb.com/muddydirtywater
渾水
摸魚手札 - 渾水 舊文
來源 source: http://hk.finance.appledaily.com