中環在線：蘇錦樑擁抱Fintech - 李華華
Blue獨立非執行董事蘇錦樑（左一）、Blue行政總裁孔德秋（左四）及騰訊國際業務副總裁楊寶樹（右一）。
潮流興擁抱金融科技，唔少前局長離開熱廚房，都幾樂意去啲新經濟公司做嚇顧問，畀嚇意見咁！財經事務及庫務局前局長陳家強就擔任正申請上
市的本地「獨角獸」企業WeLab的資深顧問，商務及經濟發展局前局長蘇錦樑（Greg So）就擔任保險公司英傑華人壽（Aviva Life）嘅獨立非執行董事。
去保險公司做獨立非執董又有咩咁特別？特別就特別英傑華人壽由全英資，變咗合資公司，英傑華集團、高瓴資本各持40%股權，騰訊（700）則持有餘下20%股權。
噚日推出新品牌Blue，主力做網上銷售保險，仲推出兩款新產品，標榜夠簡單方便易用、最重要係「零傭金」，希望可以吸多啲客，目標係喺網上人壽保險市場有一番作為。
作為獨立非執行董事，蘇錦樑梗係有撐場，仲滿場飛，邊得閒應酬記者朋友丫！不過華華諗都諗到，過去曾參與制定創新科技的政策和措施嘅蘇錦樑，應該都可以畀到唔少有用意見公司架喇！
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com