摸魚手劄：港無熟悉金融政策的年青人才 - 渾水
金融智庫除了定期出報告，關心政策諮詢給意見，最重要是培養人才。資料圖片
最近身邊個個朋友都想搞經濟金融智庫，我會在安全距離下支持。其中一位朋友，兩年前在金融界別累積了大量政治能量，竟找上門問我意見，我惟有盡力解答。
「香港有沒有甚麼金融
政策人才？」有能力、有質素的，我一個都想不到，只好提議一些薄有名氣的傢夥。「你講那些人，我都覺得一般。」其實我都覺得係，但人才難求嘛，金融界個個搵錢，誰有空做政治。大哥對這個階級的感悟一定比我高。「其實我想搵年輕人呢。」介唔介意講嚇個會叫乜名？
答案係極長，長到我都記不起來。類似是將時下的buzzwords，如「大灣區」、「一帶一路」、「經濟發展」和「金融科技」等炒埋一碟再命名出來的研究所。那我只好說：「那你只好向左派組織搵人了。」商界理論上親左，但都無人才，因為左中右都缺乏金融政策人才，這是死胡同。
金融界可能有一些冇乜太大影響力的關注組，但智庫是另一層次的組織。因為智庫除了定期出報告，關心政策諮詢，活躍給意見，還講求engage到幾多stakeholders，最重要的是培養到人才，簡單講即係有上位梯隊，有小子上到位做大人。咁樣個會先會有人加入，注入新血活力。正規的會是這樣做，但組織都要搵錢搵水喉，為既得利益者做喉舌自然難免。
社會有人畀錢鬥大聲我都理解，最怕是執行的人只為呃水，不做實事，空講意識形態，然後把金主的資金托水龍飲飲食食扮engage，那就有點失信和欠缺江湖道義了。尤其是𠵱家咁多大經濟政策推動緊，真係好容易有人混水摸魚，自己落格。
有趣的是，年輕人開始成為stakeholder的重要資產，當連我位金融朋友都有此一問，可見他是有心有想法的人。會加入智庫想做政策的年輕人，當然利益和上位機會是考慮，但多少都有一腔熱血和使命感，相對聽話，好使好用。
何況全香港的風潮都主打年輕人工作，年輕人本身的想法、網絡的重要性提高了，已經成為戰略資產，如果你對金融有基本認知，簡直就係賴尿蝦溝牛丸嘅完美配搭。所以，年輕人真不必妄自菲薄，當有個中佬話畀機會你，諗真啲，睇清楚佢開出來的條件，有時邊個幫邊個都未必知。
調番轉，朋友圈有幾位活躍媒體嘅有識之士，都有意籌備搞經濟金融智庫。以前媒體嘅社會功能係捍衞第四權，公正持平向公眾交代資訊，但𠵱家媒體開始進化做倡議式媒體，主筆有觀點有立場甚至乎有政策建議。不少智庫都落地做媒體活動，但媒體亦都進化做番in house嘅政策研究，大家互相進攻各自地盤，我見到嘅係機會，至於邊個跑得出就睇執行力嘅高低了。
渾水
專業投資者、上市公司執行董事、90後
http://fb.com/muddydirtywater
摸魚手札 - 渾水 舊文
來源 source: http://hk.finance.appledaily.com