魚樂無窮 - 唐牛 2018年11月13日
魚樂無窮：尋寶難與全職炒 - 唐牛
近期股市搵食艱難，公司通告好嘢少之又少，衰嘢卻是一籮籮。資料圖片 適中字型 較大字型
前輩何車昨日專欄開首提到「市淡，推介難」，實在不能同意更多，亦百分百道出現時股票市場搵食之難。掃一掃近日通告，好嘢少之又少，衰嘢卻是一籮籮。有線寬頻（1097）再度伸手供股，一供一兼大折讓近四成，股價當然難逃一跌，不少人問是否可撈底？呢隻股票一係唔炒，一炒就大大棍咁砌，既然係咁，點解唔等下先呢？國美零售（493）失驚無神整個四合一，拖累股價挫逾半成，望一望市值，原來仲有百幾億，似乎難逃合完再跌厄運，避之則吉。
同日高明專欄剖析全職炒家的難處，其中「並非多勞多得，睇錯要倒貼」的論點，更是擊中要害。事實上，有戰友眼見今年市況一路向西，結果接近埋單計數之時，依然有錢贏，印證了少做少錯的美德。
對於應否做全職炒家，本欄並無結論，但有一樣東西是必備的，就是極高的心理質素。市差時倉位可以日日見紅，你能否依然保持樂觀心態，不受環境影響打好每一場仗，做好每一個trade？唔會因為輸咗10萬，龜縮放棄贏返100萬嘅機會？做唔到上述嘅動作，唔該校定鬧鐘明天準時返工吧。
最後，多謝兩位給我點子完成今日的專欄！
唐牛
http://fb.com/tongcow88
魚樂無窮 - 唐牛 舊文
來源 source: http://hk.finance.appledaily.com