摸魚手札 - 渾水 2018年11月4日
摸魚手劄：劉鳴煒唔知八達通增值下限？ - 渾水
劉鳴煒 適中字型 較大字型
金句王、Package很好的劉鳴煒公子每隔數日就會跳出刷存在感。今次年輕人在節目問佢知唔知八達通最低增值額時，劉公子劉鳴煒自言有用八達通、有搭港鐵，但承認增值係交畀秘書處理，而且反問對方「我識唔識用八達通，與我做唔同嘅青年工作有咩直接影響呢？」然後批評提問係玩攻擊身份態度係不切實際，又話「認受性你可以永遠都話有問題嘅，不如搵Ocean（提問者）做青年發展委員會副主席可能認受性會高啲嘅」。噢！從事年輕人工作的劉公子，面對年輕人提問時，老羞成怒了。
劉公子這幾年大概被「離地vs貼地」的二元討論嚇怕，所以產生自我防衞機制，如驚弓之鳥。平心而論，比起去少幾次日本儲錢買樓、十歲儲十萬等驚世理論，唔知八達通的最低增值額係一點都不離地，相對合理好多。坦白講，我不算草根，未到中產，只屬小康出身，都唔知。
以前讀書年代的最低增值額是50蚊，多年來我也懶得打探這個額度有否調整，而且現在有自動增值功能，唔使親身入錢，所以更加唔理了，總之夠儲值額用就好了。當然劉公子很幸福很奢侈，有秘書代勞增值八達通，但不必說出來，羨煞旁人哦。
有財務知識，博士出身的劉公子可以運用經濟學理論去解釋自己的行為，如果他當時反應夠快，夠聰明。首先，他可以搬出自動增值做論點，如果佢知道八達通有自動增值功能的話，我係話如果。了解最低增值係無意思的，這十幾年來物價一直飛升，茶記幾十蚊一個餐，泊車多用八達通找數。視乎個人消費水平，不少人增值時都掏出紅衫魚，只差在幾多張而已。如果每次增值都只入最低額度，變相要隔日搞幾轉，行政成本好高。入最低額度的消費模式反而不理性，不適合時間成本過高，日理萬機，要專心處理年輕人事務的劉公子。
年輕人不是洪水猛獸，而是劉公子的stakeholder。年輕人心思簡單，不似成年人老屁股般精於計算，發脾氣無用只會更顯小家子氣。耍個寶，玩少少幽默感卻可以更親民，緩和尷尬，在英國生活過的劉公子多少都感染到英式政客的幽默和自嘲吧。如我是劉公子，我可能會答：「入八達通點都平過去少幾次日本」或者「平過入十萬」之類。
離地唔係問題，EQ才是。出身決定你階級，行為也反映你階級，你邊度出身無得揀，但你有自由意志去選擇點樣面對這位年輕人的提問。重點從來唔係在於點應付位年輕人，this is a show only，你係要做畀其他人睇嘛。青發委曾被指難代表青年，劉鳴煒自己都講過關鍵在願意了解和有同理心。劉公子得天獨厚，有財有勢，道理佢心知，但現實卻係知易行難。Anyway, he made my day again.
渾水
專業投資者、上市公司執行董事、90後
http://fb.com/muddydirtywater
摸魚手札 - 渾水 舊文
來源 source: http://hk.finance.appledaily.com