兜底的藝術
2019年01月29日
港股連升四日，創四個月新高，恒指早段揚221點，報27790點見全日高位，惟午後跟隨A股回落一度倒跌，收市升7點，報27576點；國指續升，收報10882點，揚8點。大市成交金額940億元。
中石化俄鋁博中和味
藍籌股領展(823
) 再創上市新高，高見84.9元，收升1.6%，報84.4元；恒安(1044) 收升1.9%，報58.95元，為升幅最大藍籌股。由於美匯下滑，金價企穩於1300美元關，刺激金礦股向上，招金(1818) 收揚4.4%，報7.85元；紫金(2899) 收升2.2%，報2.81元；山東黃金(1787) 收漲2.4%，報19.78元。
美匯上周創逾兩個月最大跌幅，加上貿易談判話包括匯價，令人民幣走勢轉強，內地航空股一如預期喺農曆新年前造好，東方航空(670) 收漲1.7%，報4.81元；南方航空(1055) 升幅相若，收報5.52元；國航(753) 收升1.2%，報7.65元；本地航空股國泰(293) 就比較弱勢，跌1%，報12.1元。
大市喺28000點前反覆，回吐同觀望氣氛增加，但唔代表無股份有表現。昨日有兩隻陸羽仁推介過可以兜底嘅特別情況股份都跑出，佢哋分別係龍頭國企中石化(386) 同俄鋁(486) 。中石化昨日收報6.41元，再升1.8%；俄鋁更大升9.4%，收報3.26元。
中石化因為爆出炒燶期油，股價喺月中大插，跌到去5元邊緣。陸羽仁拆過局話，呢個係一次性虧損，而且對整體盈利唔構成好大衝擊，夠膽可以低吸，由低位計回報率有兩、三成。
俄鋁就喺美國政府宣佈打擊後股價不斷插，喺跌穿2元時，陸羽仁認為可以一博，插到1.5元再建議買入，若然兜底持有至今仲和味，回報率近倍，真係買得大賠得大。
買急插股雖然回報高，但絕對係高風險玩意，唔可以亂玩，有中環茶友食胡之餘，問有冇一啲原則可以跟？陸羽仁話呢個係藝術，好難死跟規矩，但藝術創作都有啲準則可以參考。首先當然係睇公司實力。中石化同俄鋁共通點係乜？答案就係同屬巨企，唔單止咁，而且有啲大到唔可以冧嘅味道。有咗呢個底牌，落注泡湯嘅機會就細好多。
兩間公司大到唔可能冧，中石化係三桶油成員之一，係龍頭國企，實力唔使多講。俄鋁大家陌生啲，但集團不但係俄羅斯喺能源以外最大實力工業，更係賺取外匯嘅印鈔機。
公司能夠有今時今日嘅地位，全靠俄國嘅天然條件，兼具礦藏同平價能源成本，其他公司唔易替代。當日美國話制裁俄國，全球鋁供應鏈即刻出問題，連英國嘅金屬交易所都受影響，所以俄國必定力撐。另一方面，美國都要考慮制裁俄鋁對美國企業引起嘅連鎖效應，更何況總統特朗普同俄國關係，予人感覺千絲萬縷，所以最後大股東歐柏嘉承諾退出董事局後，美國制裁就開始鬆綁。
睇住業績分段食胡
除咗睇背景同政經分析，對公司基本面認識都好重要。以中石化為例，公司傳出炒期油損手，初步話數以十億元計。陸羽仁當時計過數，首先係中石化盈利以百億計，輸幾十億應該頂得順，股價由高位大插兩成幾，顯然反應過大。再者，中石化係做下游生意多，油價跌其實對公司有利。公司對沖期油，係買油價萬一向上嘅保險，雖然油價不升反跌令期油輸錢，但油價向下對公司盈利甚有幫助。結果中石化2018年度業績快報，按中國企業會計準則，淨利潤為623.86億元人民幣，就算扣除炒油虧損，都按年升22%，每股基本收益0.515元。
俄鋁喺被制裁風波前股價徘徊喺4.5元水平，當時大市喺三萬點左右，礦業股跌得多啲，O依家股價反彈後，回落幅度開始貼近大市。至於中石化基本上已經消化炒油消息，若論基本因素中石化比俄鋁穩。中石化由於業績靚仔，加上此股一向派息不俗，以及未來有重組概念，唔使急於一次過食胡，未來仲可以低買高沽炒上落。
陸羽仁
金融High Tea 舊文
來源 source: http://hdfin.stheadline.com