A股地雷 小心踩中
2019年01月30日
借住個別公司業績欠佳，美股出現調整，杜指一度下跌超過300點，收市跌幅收窄為209點。美股下跌有少少係中國副總理劉鶴到達美國商談貿易問題，大家先減定磅等運到。
中證監急否認搞拋空
美股急插主要係公佈出嚟嘅公司業績唔理想
，最受矚目嘅兩間公司－重型機械商Caterpillar以及晶片商Nvidia都係歸咎於大陸市場放緩。Caterpillar好多推土機都係賣畀內地，算得係美股中嘅內地概念股。劉鶴抵達美國談貿易協議前，美股爆出呢啲消息，對美國鷹派不無壓力。美國不少上市大公司做緊大陸生意，中美貿戰唔受佢哋歡迎係好正常反應。從呢個角度講，美股呢個時間下跌，可以話跌得合時。
華爾街出現回吐潮，是否大鱷興風作浪，向華府發出訊息呢？呢個無人敢講，皆因真金白銀做交易，同口講完全唔同。不過，從炒作角度，美股之前炒貿談氣氛和緩都炒咗一段時間，消息已經反映了八八九九。今次劉鶴到訪前，先傳出有幾個關鍵分歧未解決，美國又正式起訴華為孟晚舟，大有施加壓力嘅味道，趁住呢個消息先食胡，然後再睇談判反應部署絕對無壞。
美股跌得深，港股反應相對溫和，指數開市跌逾200點，但好快就縮細至幾十點，一度甚至倒升，最後恒指收報27531，跌45點；國企指數收報10867，跌15點，成交919億元。港股升勢斷纜，同內地A股走軟亦有關係，上證指數早段跌得急，午後開始回穩，結果收報2594，微跌2點；深成指數收報7551，跌38點。A股下跌部份係因為市傳內地研究拋空機制，一聽可以拋空，投資者就係出敏感反應。中證監對於市場反應都好緊張，火速澄清主席易會滿近日並未召開任何記者會。
對於有報道指，易會滿喺主持嘅記者會上表示，今年主要工作係推行沽空機制等，發言人強調，有關消息純屬謠言。發言人又指，證監會正按照中央經濟工作會議的部署，堅持市場化法治化方向，加快資本市場改革開放及推進資本市場健康發展。言下之意，似乎係證監會強調改革及推進發展，引起會否推行沽空機制等的揣測。好明顯中證監唔想見到市場有呢個反應，所以第一時間出嚟澄清。
中證監今次換人，內地官場同市場都幾矚目。原先做呢個位嘅劉仕余任期都係三年左右，跟住調咗去供銷總局做個閒職，於是惹嚟佢因為A股跌跌不休被問責。唔理呢個講法有無根據，從市場呢個解讀方法，可以見到內地對股市跌到低位嘅關注，以及維穩傾向有幾濃。喺呢個背景底下，中證監一有風吹草動，就立即出手解釋，以防新官上任，躺着也中槍。無論喺乜嘢地方做官，都要講講官運。A股跌到近年低位，劉仕余呢個時候被調走，易會滿呢個時候上場，眼前局面動輒得咎，但亦有機會係行運醫生醫病尾，畢竟內地股市已跌咗好長時間，加上中央開始放鬆銀根，點樣做就要睇易會滿嘅能耐。
國壽盈警 股價即跌
中國人壽(2628) 發盈警，預期2018年全年，淨利潤按年下跌50%至70%，即由2017年賺322.53億元人民幣，下跌161億元至225億元。國壽表示，盈利下跌主要是受權益市場整體震盪下行影響，公開市場權益類投資收益按年大幅減少所致。
受到消息影響，內險股跌幅相當較大，國壽(2628) 昨日跌了1.6%，收報19.26元、平保(2318) 跌了0.4，收報73.5元。撇除昨日受消息影響下跌，內險股近日受中央放水同限低投資限制影響，股價有扭轉去年落後跡象，特別係國壽呢隻國企大笨象不再席地而坐，這段日子竟然跑贏了大市，相信部份原因都係博內地水頭增加，投資環境有改善。不過，據國壽發佈業績會減少5至7成，有人喻為A股地雷。A股去年不振，國壽業績有多少係預期中，現在壞消息公佈，大笨象唔再坐係度，但係繼續跑前抑或碌低，要看市場點睇A股前景。
炒國策5G升車股跌
大市繼續跟政策炒，發改委出台促進多項消費措施，其中擴大升級資訊消費，加快推出5G商用牌照。其他5G股向上，摩比(947) 漲12%收報1.3元；長飛光纖(6869) 收升3%報22.6元。相反，發改委促汽車消費，就搞到汽車股普跌，長汽(2333) 挫4.41%收報5.2元；遭大摩唱淡嘅吉利(175) 收插4%報12.66元，為跌幅最大藍籌股；廣汽(2238) 收挫3.3%報8.5元。
另外，周二復牌的康大食品(834) ，其大股東天元錳業，與潛在買方訂立諒解備忘錄，涉及出售康大食品股份，康大股價曾爆升1.08倍，高見1.04元，收市仍升88%報0.84元，為升幅最大個股。
陸羽仁
金融High Tea 舊文
來源 source: http://hdfin.stheadline.com