大茶飯 - 青冰 2019年2月18日
【大茶飯】理性分析未必有錢袋（青冰）
雖然恆指在周五急回逾五百點，但今年仍升了二千點，如果由1月3日低位24896點計，上周一度累升3637點，你話如果有高手在1月3日那天吹雞叫大家買貨，相信只會被我們狠狠的恥笑，好友大獲全勝，淡友遍體鱗傷，當然都有更多人係1月頭看淡，現在大叫牛市及成手貨了。
青冰在去年9月曾撰文，為恆指計數，最近十年內的三次較長的跌市，大時代爆煲、歐豬及雷曼，分別是從高位跌了10、11及12個月，跌市的領頭股匯控(0005)、港交所(0388)及今次的騰訊，都是從高位跌了超過四成，今次的恆指跌了9個月，如已經見底，算係最快完成調整的熊市。
數就係咁計，但卻沒有直接為青冰帶來進賬，去年十月跌到四腳朝天之時，未敢入市，但理智告訴自己咁絕望的跌法，最多咪跌多半年，係時候將啲強積金轉去恆指，分三注轉應該損傷有限呱。奈何青冰都係一介凡人，恐懼蓋過理性分析，未有付諸實行，當刻只諗到保命為上及持盈保泰。
年初小米(1810)跌到反艇，禁售期前個零星期突然拎幾十億沽壓出來報導，全城恐慌，結果都不負眾望，七個交易日跌了26%，「見底」那天又有大手上板，真係有人配股，小米死了，自然更多人期望同是W股的美團(3690)會重蹈覆轍，即使明知3月21日禁售期先完，但亦吸引了不少人在四十零蚊造淡，青冰極之認同呢隻股係曳嘢，燒錢比賺錢叻，所以絕對唔會買，但最近一個月由42蚊升至64蚊，急升五成，基本因素應無大改變，只係市場氣氛逆轉，或者戰友會覺得佢係死貓彈啫，近期市場亦是被資金吹出來的假牛，但無論隻牛是真定假，最客觀可信還是個倉的數字。
股市從來都是資金推動，跌市就梗係資金流走啦，阿媽梗係女人嘅，我們始終是老散，要接受資訊永遠落後於大戶，蘋果的股價在第四季狂跌，但到今日我哋先知，巴菲特在第四季大手減持，與其執著自己睇得啱唔啱，不如著緊啲睇錯時落實執行exit plan好過啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com