畫餅要識食胡
2019年02月08日
送狗迎豬，香港放年假，外圍股市偏穩，雖然隔晚美股微跌21點，但之前杜指有進帳，整體係橫行格局。今日港股重開，紅盤能否高開就要睇自己。
港股狗年氣氛由極差轉為平穩，春節前持續好轉，最後一個交易日得半日市，以升59點收結，恒指收報27990
點。恒指成個狗年累跌3125點；國指就收報11036點，狗年累跌1499點。上年狗年原來係隻惡犬，恒指開局喺30000點樓上，3月中一度升至近32000點。但係中美貿易戰開打，加上聯儲局的加息壓力，令港股走勢逆轉，恒指去年10月第二度下跌，一度插穿25000關，全年高低波幅逾7400點。
個股當中，藍籌嘅手機孖寶狗年表現最曳，瑞聲科技(2018) 瀉逾68%，舜宇光學(2382) 插38%。陸羽仁喺手機股最當炒時，已經話呢個板塊估值過高，但係好多分析員將呢種製造業循環股當增長股買，循環股好似汽車、地產盈利大起大落，估值唔可以太高。好多分析員誤以為手機市場可以不斷增長，畀呢類公司幾十倍市盈率，一旦表現唔對辦，咁就跌到阿媽都唔認得，短期內呢個板塊仲係難以寄予厚望。相反，狗年表現最醒藍籌為屢次破頂嘅領展(823) ，累升逾38%，公用股中華煤氣(003) 同華潤電力(836) 都榜上有名。
石田為業好難耕
踏入豬年，新界鄉議局主席劉業強按傳統，喺年初二到車公廟為香港求籤。劉業強為香港求得第86籤中籤，籤文為「石田為業喜非常，畫餅將來未見香；怎曉田耕耘不得，那知餅食不充腸。」籤文則是「出入謹慎，家宅不吉，自身平安，求財不遂。」大會官方解籤師話，首句係相當唔錯，指香港先天條件好，要點令市民安居樂業，要靠政府施行下去，其餘三句籤文就不了了之。
車公廟「場外解讀」就認為，此籤「非常之差，實為下籤」，因籤頭係望梅止渴，即係「得個睇字」，而田地布滿石頭唔能夠耕種，畫出嘅餅亦食唔到。佢覺得官方解籤師唔解釋餘下籤文，認為對方係「唔敢再解落去」。他建議市民只有自保，「唔好買無謂嘢，有用先買，要珍惜錢財。」呢個建議用喺投資，都有參考價值。
豬年氣候最大分別係各國央行嘅貨幣政策。狗年惡犬咬人，主要係各國不斷收水，美國縮表同加息雙劍齊落，歐洲都逐步煞停放水，內地搞供給側改革之餘，同時嚴控樓市，但呢個形勢隨著中美貿易拖慢經濟發展開始轉向，其中美國收水情況更加明顯。
美國政府上下喺豬年前不斷放「鴿」，有中環茶友話，若然睇美國就業數字，經濟仍然不俗，今年增長放慢，多少同基數大有關，然而，由白宮到華盛頓似乎都好緊張，呢個情況反映美國忍痛能力愈嚟愈低，稍有異動就要食止痛餅，利用貨幣政策去紓緩不適。出現小事就要調整貨幣政策，有兩個原因，一係美國債務不斷累積，形成利息一加造成好大影響，股市對利率去向反應愈嚟愈敏感。二係政治因素，O依家華爾街對政治影響力強大，一旦股市下跌，就造成巨大政治壓力。舊年12月儲局加息後，一眾大鱷趁股市下挫齊齊施壓，聯儲局主席鮑威爾即時萬箭穿心，感受比總統開火相差唔遠。狗年尾搖啊搖，恒指終於追番唔少升幅，主要係公用股同資產股喺利率有可能轉向下攀升，但要留意嘅係，美國數據O依家仍然未算好弱，雖然息魔陰霾淡化，但如果美股復熾，虛火上升，咁又要留心利率動向嘞。
另一個影響豬年市況因素，係美國總統四年一任，到咗年中又開始進入選舉敏感期。特朗普做咗一屆，理論上會爭取連任，令選舉年效應特別明顯。特朗普同其他近代美國總統不同，出自非主流體系，佢靠直接爭取選民支持坐上呢個位。特朗普做咗總統後，明顯未獲建制接納，特別係民主黨方面，所以佢要不斷搞民粹招數保持支持度。不過，自從中期選舉共和黨喺國會失去控制權後，民主黨對佢嘅掣肘顯著增強。國會喺內政方面對總統限制可以好大，外交就係總統主導，所以見到呢段時間特朗普不斷搞外交招數，一時又話同北韓領袖金正恩會面，一時又話要郁委內瑞拉總統馬杜羅。搞咁多動作，估計都係要避開國會掣肘，繼續向選民交功課。
央行停收水金價緩升
特朗普O依家已經係騎虎難下，若然唔做總統，必然會俾人查到七彩，所以下半年開始，估計佢會有更多動作幫自己助選。表面上，各國放水有利股市，但實體經濟合共上行接近10年，好多指標都係高位運行，疲態相當明顯，雖然政府大力催谷，多少有啲似畫餅充饑，短時間可以發揮心理作用，始終基數大，勞動同生產力緊張，都對增長產生制約，所以股市低迷時可以買，炒央行維穩，升到咁上下就唔好只係望住個餅，有胡唔食就隨時變傻豬。
按照美國放鬆銀根，以及特朗普爭取連任兩個因素，對利率敏感股份有利，好似地產股同公用股喺今年首季表現都好。茶友話，另一類可以留意嘅股份就係金礦股，過去幾年黃金基本喪失保值功能，主要係美國經濟好，美元強勁，就算金融市場唔穩定，金價都冇乜反應，搞到金甲蟲大歎黃金失去避險功能。
但自從美國幣策有轉向跡象，金價由1200美元一盎司水平冉冉向上，慢慢有突破。雖然金價唔可以話走勢強勁，但由現水平唔算高，若然特朗普想爭取連任，其中一個可能性係對外用兵，當地緣政治風險增加，美元又弱，咁金價就有機會向好，所以金價回調時，養吓金豬可能都係今年投資策略之一。
陸羽仁
金融High Tea 舊文
來源 source: http://hdfin.stheadline.com