低息氣候罩股市
2019年06月21日
港股本周大幅反彈，不過市場人士仲係有興趣講政治多過講股市。熱話之一係工聯會議員麥美娟喺禮賓府爆粗問候特首林鄭月娥，代表證券同保險界嘅議員張華峰日前就有意無意證實傳聞，為粗口風暴二度加油，麥美娟亦被封為「烈女」。
特區政府今次修例
輕視反對聲音，建制派中唔少人有意見，特別係商界人士怕影響生意，但敢怒不敢言。中環茶友話，好似金融界都擔心一旦條例通過，會出現撤資潮同金融波動，o依家條例反艇，張華峰漏料，都有啲借人把口鬧特首嘅味道。
緩修例消除不明朗
張華峰證實特首俾人問候，話建制派日後選情可能受影響。茶友話，呢個可能都反映佢本人心聲。過去證券界由代表中小型經紀嘅詹培忠雄霸多年，老詹就算坐監，出嚟一樣當選。本來佢準備添食，點知喺選前中風，於是個位畀張華峰坐咗。不過張華峰坐呢個位後，港交所同證監會政策全面向大行傾斜，有本地商人銀行商層大歎搵食艱難。o依家本地中小行好多靠做「孖展」搵兩餐，當局想收緊，但冇人出嚟反映意見，所以下屆張華峰選情本來已可能有暗湧。o依家再整多單修例風暴，茶友話聽張華峰嘅爆料片段，佢講嘢講到一嚿嚿，連禮賓府都講唔出口，如此表現，唔知係咪覺得自己坐得好穩呢？
如果要爭證券界席位，詹培忠似乎係廉頗老矣，但其子詹劍崙好似不甘寂寞，小詹係某小國名譽領事，有份出席林鄭會見各國領事嘅宣講會，照計對呢條條例同外國反應會有第一手感覺。老詹若想小詹克紹箕裘，會不會過兩招等佢趁亂殺上？
本地政治環境雖然緊張，但修例暫緩，喺投資環境上，的確減少不明朗因素。外圍方面，聯儲局一連兩日嘅議息會議結束，聯儲局果然維持聯邦利率2.25至2.5厘不變。議息聲明刪掉「耐心」說法，聯儲局主席鮑威爾喺記者會上透露，「很多與會官員已見到現時有加強寬鬆政策的狀況」。投資者估計美國喺下半年減息機會好大。聯儲局今個月唔減息，總統特朗普顯得愈來愈無耐性，據報佢考慮將鮑威爾「燉冬菇」，鮑威爾就回應話法律清楚畀佢四年任期，佢要繼續為美國服務。喺強勢總統泰山壓頂下，美息易跌不能升，成為可見將來全球市場一個重要大氣候。
候回落可酌量加倉
聯儲局維持利率不變，加上中美貿易談判有轉機，均利好人民幣。人民幣匯價走強，升穿多個關口，在岸人民幣報6.853兌1美元，飆484點子。離岸價升至6.8558兌1美元，升近400點子。
同樣內地資產都受惠，A股造好，上證指數一度逼近3000點關，高見2997點，收報2987點，升69點。深證指數亦升超過2%，收報9134點，升209點。各類股份幾乎全線上揚，金融股升近5%。香港掛牌的A股ETF隨A股揚升，南方A50(2822) 升3.9%，報15.12元；華廈滬深300(3188) 報44.75元，升3.2%。內險同證券股跟隨A股飆升，平保(2318) 急升3.7%，收報94.35元，為升幅第二大藍籌股。吉利汽車(175) 升4.9%，為表現最佳藍籌股。
內地股市帶動下，臨尾恒指升近高位，收報28550點，收升348點；國企指數收報10922點，升157點，成交978億元。在呢個環境下，如果持股好少，都要等大市回吐時，酌量加番啲倉。
陸羽仁
金融High Tea - 陸羽仁 舊文
來源 source: http://hdfin.stheadline.com