智取大市 - 晉佳 2019年8月7日
【智取大市】侵侵Be water？ - 晉佳
美國大選漸近，特朗普選擇以快打慢，免得搞到太遲而影響明年選情。 資料圖片 適中字型 較大字型
美國財長姆欽一直係對華鴿派之首，連財政部都同意列中國為滙率操縱國，顯示對華鷹派呼聲幾咁高漲。美國會繼續鷹派落去，就會同中國打到半身不遂。還是始終會Be water？唔做咁盡，股市要緊，特朗普但求連任為重？
列中國為滙率操縱國，情況等如差佬舉曬黑旗橙旗，1分鐘內放催淚彈？20分鐘內放催淚彈？定係一粒都唔放，擺完姿態收隊？任佢講。一年後中國滙率美國滿唔滿意，其實都係口講便行。
由於中國死都唔買美國農產品，累及特朗普票倉，為求連任，特朗普團隊幾乎開曬戰線然後逼中國埋枱傾，而家嗱嗱臨開大個價，然後等還價。成件事冇改變之前玩法，由於美國大選漸近，於是選擇以快打慢，免得搞到太遲就影響明年選情。港股跌到26000點樓下，夠反映3,000億美元中國貨10%關稅因素。美股一兩日急跌，睇嚟都倒逼特朗普Be water，只容許再發零星招數。
港股另一項變數當然係政局因素，北角福建幫事件、荃灣斬人事件，令全城驚見紅，究竟今次短期終局會係點？對於港股影響可能係1,000點上落，但作為香港人，希望不要見到流更多血了，Be water。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com