一直以來，我都話追求財務自由的其中一個重要守則，就係唔好借錢俾人。因為黃子華話齋，借錢多數無好結果，通常都會令你無咗個朋友，更可能會令到自己嘅投資計劃倒退，所以我從來唔贊成借錢俾人。
仲記得十幾年前，有個朋友借左幾十萬比人（當時大埔翠屏花園約70萬元），最後債仔自殺死咗，咁呢個朋友原本宜家可以財務自由
，但變咗宜家重係租緊樓住！
我亦試過有朋友因為部車或層樓上唔到會，借錢俾佢哋解決問題，但係佢哋搞掂咗、上咗會都無還錢！唔好以為救人一命，人哋一定會知恩圖報，唔避你已經算好彩。所以借定唔借？預咗唔還先好借！哈哈！所以對每一個朋友，我心中都會有個預咗唔還嘅數！
但世事真係無絕對，好似早前我遇到周轉困難，要借一個不小的數目，問過財務公司一按利息最低8厘左右，其實我只係需要借1至3個月左右的短時間，幫襯財務公司手續好繁複，又要按契、又要俾律師費。當時我就諗，不如問朋友借，就算俾返利息朋友，都可以免卻咗煩複手續同還款期較靈活。原來我呢個唔贊成借錢嘅「專家」、「專欄作家」，今次都係有講一套做一套，自打嘴巴！所以真係唔好盡信啲專家，尤其是話︰我建議你買，但我沒有持有上述股票嗰啲！即係點？老點？
面對難關，我求助於fb大神，好多人唔相信有奇蹟。但點知奇蹟真係出現咗，當然中間係動咗少少腦筋，一晚之間有約40個人肯借錢俾我，幫我渡過這個難關。
喺今次公開向朋友借錢過程中，我發現不同朋友有不同反應，基本上可分為理性與感性。理性的朋友會問得好詳細，借咗錢會用喺邊、幾時可以還錢。而感性的朋友，就沒有過問太多，話借就借。
其實講到借錢，我一向都係屬於理性。因為借錢唔一定可以真正解決到佢嘅問題，如果只係暫緩嘅話，其實可能係害咗佢添！所以如果唔係真正解決到問題，又或者借錢後無一個圓滿解決方案，我就唔會考慮同人借錢或借錢比人，因為呢個其實係一個唔負責任嘅行為。
我一向都話自己係偽善者，而犬兒更一直覺得我無論在內地山區起學校、診所、助學或去深水埗派飯，其實都唔可能幫到所有需要幫助嘅人，更覺得其實只係做Show。但係原來我偽善咗十幾年，係咪真係幫到人我唔知，但原來最後其實係幫到我自己。因為今次有部分朋友，我們見面同傾計次數不多，但一聽到我有困難，即刻幫忙。其中有位朋友話，話因為見我過去一直做善事（做Show），所以覺得「對於一個做善事唔眨眼嘅人，俾佢呃咗都只能怪自己有眼無珠。」，雖然今次我好感激佢嘅幫忙，但係都要忠告一下佢，騙徒手法層出不窮，做善事唔眨眼，可能講大話都係唔眨眼！所以除咗我，唔好再隨便借俾其他人啦！哈哈！
2019年11月16日 舊文
來源 source: http://imoney.hket.com