冰說聰明 - 青冰 2019年12月5日
【冰說聰明】領展的回購習慣 - 青冰
領展CEO王國龍。資料圖片 適中字型 較大字型
本欄今年幾次品題領展（823），主要研究佢賣完資產唔派息而決定回購，第一次寫時係6月，正是全年業績後，股價95蚊樓上，息率不足3厘，當日的論點是自2015年後，市賬率最低見過0.79，最高是1.11，而當時係約1.07，屬偏高，按近幾年的回購手影，大多數都係九折樓下出手。
半年過去，領展在上月公佈中期業績，收入及派息皆按年增長約8%，每股NAV微升至90.58元，不過股價就在近幾日跌穿11月低位，股息率又回升至3.5厘，究竟是否吸引，或可從管理層及公司的舉動去推測。
CEO王國龍去年8月首次減持，價格約77元，當時係話套現係幫仔女置業，沽完之後10月低見68.50元；去到今年10月再減持，作價約85.7元，又好巧合，沽完至今都上唔返。公司自6月公佈6,000萬股回購，一星期後反送中運動便開始，本港的消費市場及經濟也無可避免受到影響，領展股價由歷史高位見頂回落，而回購亦在8月至9月進行，合共買了1,303萬股，入市價介乎86至89.4元，用返當時的NAV計，市賬率稍低於1倍便出手，不過最近一次回購在9月24日，這亦是領展近年回購的習慣，在業績前兩個月收手，但中期業績在11月13日公佈，至今已經3星期了，還在等甚麼呢？
回看中期業績，公司係咁講的，「我們在執行此回購計劃上受到多個因素影響，包括市場情況、基金單位價格、成交量及其他監管考慮」，昨天領展股價是接近2019年最低，執筆之時仍未見到回購通告，但如果仍未出手，可能反映公司認為仍未到價，仲可以等嚇，但係按傳統，領展在2014至2018的5年裏，12月都會出手回購的，今年會否因政治及經濟氣候打破傳統，拭目以待。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com