全城聲討滙豐，有樓市KOL話為滙豐捱了一刀，有立法會議員指香港投資者助滙控捱過「最艱難時候」，質問滙控「對唔對得住香港投資者」。今期這個標題，確有點反高潮，過去幾日接觸數位揸貨股東，滙豐停派息的決定，最少有兩點值得投資者反省及深思。
滙豐冇對唔住散戶，只是大家寵壞了滙豐。
由長情
股東、街坊師奶，以至明星散戶，仍迷戀昔日滙豐風光，覺得滙豐衰極有個譜，派息最多只會減不會停；經歷過海嘯的，更相信滙豐見底急彈歷史會重演。就是這種潛移默化、洗腦式印象，滙豐每逢到關鍵大位，散戶血肉長城就會出現，愚人節當日的散戶40蚊佈陣，結果散戶敵不過大戶力量，上周五甚至跌穿38元。
老一輩愛稱滙豐為大笨象，甚至小飛象，在他們心中，滙豐代表香港，代表港股；滙豐死了，港股亦唔慌掂。實情是，滙豐與恒指已不同步，滙控佔恒指比重已急轉直下，買港股等於買滙豐的錯覺，注定跑輸大市。
除了市值夠大，早年滙控佔恒指比重相當誇張，港股升跌市基本上睇滙豐走勢而定。統計20年恒指最大三隻比重股份，由2001年開始，基本上由滙控霸佔首位，但佔比已由2003年最高35%，降至近年約一成水平。最新佔比已跌至8%，首次跌穿三甲位置；隨住美團、阿里及其他大型中資股可能染藍，滙豐佔恒指比例或跌至半成，亦不意外，也是大勢所趨。
2008年海嘯後，滙控基本上由本港及亞太區貢獻大部份利潤，去年更撐起集團九成稅前利潤，抵銷其他地區虧損。雖則如此，滙豐始終不願遷冊回港，埋下今次被英國監管機構叫停派息伏線。很多退休人士「相信滙豐，唔驚冇息」，全部棺材本全投滙豐，結果今次滙豐失息，致退休現金流停頓，錯愛滙豐，收息神話亦告破滅。
滙豐冇對唔住散戶，只是大家將失敗賴落滙豐。
4月1日愚人節，滙控因應英國監管機構要求，銀行暫停派息及股份回購，結果除淨了的末期息（約1.64港元）取消派發，今年度首三次季度息（估計共約2.34港元）亦不會派發。當日滙豐股價跌近一成或4.2元，金額相當於取消及停發股息金額。股價跌，入曬派息數，大家可如此解讀，但上市公司賺到錢，派息理所當然，卻非必然，上市條例沒明文規定一定要派息，只是公司根據本身條件決定。
股價升跌取決很多原因：股息多寡、盈虧狀況及前景能見度，如停派息是愚人節下跌原因，那麼今年首季跌了16.7元，應入邊個數。
銀行打開門做生意，向客戶吸存款然後派息，這是白紙黑字、有根有據，沒派息就是銀行欠客戶。滙豐停派息前，管理層口頭上仍承諾，派息政策不變，結果監管機構落旨，不得不跟，普通股停派股，但美元優先股派息不受影響，事關後者在2010年發行時，已定明派發股息日期及金額，不受業績好壞以至監管政策影響。
或者反過來問，滙豐維持派去年末期息，股價難道會不跌嗎。從公司角度，滙豐停派息一年，節省800億元股息開支，對財政狀況以至面對挑戰，只好不壞。如股價升沒派息，抑或股價跌照派息，兩者選其一，滙豐股東應知點揀。
將自己投資失敗、眼光失準，歸咎滙豐不派息太仆街，然後給自己下台階，心理上會好過些，這種阿Q精神勝利法，卻是很多散戶賺糖輸廠癥結。
息差收窄、英國脫歐，滙豐今年累跌38%，但其他歐美環球主要大行，一樣跌到四腳朝天，股價腰斬一半的不是少數，市盈率可低見五倍，市賬率更低見0.3倍破產價；滙豐股價跌，諷刺地已算是最好的頭兩間。這是環球銀行面對的宏觀問題，可惜，很多股東視而不見。
滙豐CEO向股東發信指深感歉意，但投資決定，自己負責，股票市場沒有誰欠誰，賺息賺價不是take it for granted.
股榮
http://fb.com/stockwing1
趣BlogBlog - 股榮 舊文
來源 source: http://hk.entertainment.appledaily.com