金融High Tea——道富縮骨 盈富縮沙
美國失業數據醜樣，即將上任的總統拜登準備加大力度放水，美股上周五飆上新高收市，但尾段力水有點不足，港股開市跟隨外圍升破28000點後，再創近一年新高，但午後內地A股回軟跌1.1%，加上比特幣在亞洲時段急挫，美股期貨乏力，令大市
一度倒跌，恒指收報27908點，微升30點；科指反覆靠穩，收升0.4%，報8665點，大市成交連續五日突破2000億元，達2541億元。
熱炒資產湧現回吐潮
1月開局資金狂炒一輪資產後，開始出現有點畏高跡象，金價由高位回調，比特幣在衝破4萬美元後，於亞洲時段大幅回落至3.3萬美元之下。股市方面，內地A股全日反覆低收，上證指數收報3531點，跌1.1%，連跌兩日；深成指數收報15115點，降1.3%，成交連續六日超過一萬億元人民幣，熱炒的半新股，有「食油茅台」之稱的金龍魚出現明顯調整。內地A股現時整體水平不算特別高，但在強者愈強運作模式下，個股估值不便宜，形成在高位有回吐壓力，所以不能說資產價格肯定已經見頂，但顯然就需要獲利回吐消化升幅。
港股情況都相似，強勢股創新高後未能持續，但落後股暫時未能接上，好似去年第四季起一直跑贏大市的友邦（1299）高見99.6元，到收市已經要倒跌0.2%，報98.85元，友邦累積升幅不小，股價面臨紅底大關，類似心理關口不容易衝破，有經驗的股民都會喺大關前減磅，期望等回跌一些再撈番。
另一隻大強勢股港交所（388）同樣倒跌0.4%，收報450.2元。港交所近日有不少好消息，最直接係新年後交投急增，1月成交整體逾2000億元。銀紙陰陰貶值，資金流向股市，理論上利好港交所長遠生意。美國大舉放水在即，加上大量中概股準備回流，港交所真係坐喺度等收錢。不過港交所現時市盈率去到60倍，息率跌穿1.5厘，幾乎去到美債咁低的息口，回吐壓力自然大。
中環茶友話，港交所雖然坐擁美國印錢之利，但都要識得悶聲發大財，因為中美角力升級，危及金融領域風險正在上升。美國財政部打擊中國三大電訊股，中國表明財金機構有權不理會，香港盈富基金（2800）理論上可以不跟從。盈富基金由政府成立，股東相信美國人或機構不多，就算繼續持有三大電訊股，美資要沽貨影響都有限，但盈富基金的管理公司是美國道富環球投資管理公司，道富決定跟從美國財政部要求，相信係抱住好漢不吃眼前虧的想法，無謂同美國政府抬槓。現實上，特朗普喺卸任前不斷攪局，務求留個爛攤子畀拜登，搞到金融機構都無所適從。
不過有金融猛人同陸羽仁講起，外匯基金委任盈富基金的管治委員會，委員會委託道富公司去管理盈富基金，如果政府不滿意道富做法，不喜歡出現道富縮骨、盈富縮沙的局面，長遠而言可以更換基金管理人。
盈富表態後，下一個就輪到恒指服務公司。恒指服務公司處境比盈富更複雜，因為恒生（011）係本地銀行，同中國關係都好密切，若然恒指踢走三大電訊公司，有可能得罪中央，但若然不踢走，恒生可能怕會成為制裁目標。所以從恒指服務公司來講，最好中國同拜登政府盡快傾掂數，以免左右做人難。
落後板塊估值仍低廉
短期而言，大市相信受幾個因素影響，首先係美股喺高位回調壓力甚大，雖然新政府準備再大放水，但美國經濟喺疫情嚴峻下，體質愈來愈弱，能否死谷落去疑問愈來愈大。再者，中美角力會否惡化到金融層面存疑，華府現在不斷打壓中國企業，中國回應相對克制，估計是在觀望民主黨上台後的政策，現在捱埋「特襲」最後一浪攻擊，就應該有轉機。本地因素方面，現時強弱勢股經過一輪升浪後估值差距拉大，落後股能否接力頂一陣，對指數高低會有相當影響。
現時科技同強勢金融股估值甚高，但好似香港地產、內房、內銀仍然低殘，昨日內房藍籌股反彈。如果藍籌落後股可以炒住落後，對消化累積升幅會有幫助。
陸羽仁
金融High Tea - 陸羽仁 舊文
來源 source: http://hd.stheadline.com