笑到最後｜判斷股災的三大因素（高明）
笑到最後｜判斷股災的三大因素（高明）
一個股災係會令你失去所有升幅，之前嘅任何事情包括耐性、捱價、分析、持貨等等，短時間內化為烏有。
電影對白：「出得嚟行，預咗要還」，經常喺股票市場上邊睇現到，真正嘅還，就係股災。情況有如高潮過後嘅美團（3690）
，一跌就還返一年半嘅升勢；又有如疫情之初嘅道指，一跌令到指數回到三年前。更加唔好提恒大（3333）跌穿招股價。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
一個股災係會令你失去所有升幅，之前嘅任何事情包括耐性、捱價、分析、持貨等等，短時間內化為烏有，紙上富貴帶唔走無法笑到最後。但係銅板嘅另一邊係，一啲有股災特性嘅跌幅經常發生，如果你每次大跌都大叫狼來了，結果就係經常低位打、高位追，隔籬買咗冇睇嗰個埋單賺得多過你倍倍聲。
所以判斷真股災定假股災係出嚟行嘅重要元素。至於點樣判斷，除咗用港女靠feel嘅方法之外，一啲證據依然係需要，否則就會流於「我覺得係就係囉」嘅水平。
高明都叫做稍為經歷過幾次股災，叫做有三個因素比較可靠。
一、本地爆發定外來輸入
真正嚴重嘅股災，必然係本地爆發，任何外地輸入嘅金融危機，最後都係高高舉起，輕輕放下。最典型嘅一次就係2008年美國金融海嘯，對於港股影響主要喺美國次按揩大鑊嘅滙控（005），純粹香港嘅影響遠遠未及美國，樓價仲稍為跌一跌就未停過上升。所以判斷今次係咪股災，最緊要睇邊度係震央。至於所謂傳染性，2008年後金融機構勒得好緊，影響都好有限。
所以將所有外來輸入嘅股災講到好嚴重，然之後要將不明朗因素冇曬先至可以買貨，恐慌恐慌恐慌，嗰種手法唔係新手，就係大老散。
二、央行取態
2008年後世界已經因為量化寬鬆扭曲過一次，就係資產市場同埋實體經濟脫鈎；2019年量化再寬鬆，再扭曲一次，就係資產升幅輸比貨幣供應增長就係輸。世界已經扭曲到買資產唔一定贏，但係揸傳統貨幣一定輸嘅局面。同一時間，先使未來錢嘅央行手法已經過咗可以返轉頭嘅時間，例如將聯儲局資產負債表回復到疫情前嘅四萬億美元，即係現水平嘅一半，納指跌番落8000點，恐怕冇人會接受到，有遊說資金嘅大財團必定會用盡一切手段支持托市政客。 英諺有雲：不要跟聯儲局作對，央行實際收縮定係放水會主導有冇股災嘅發生。
三、股災洗版
一隻手掌拍唔響，股市係眾人之事，必定有一方貪婪，另一方恐懼。市況嘅走向就係一個黑色幽默，大多數人貪婪時，下跌機會比較高，所以網上有連登定律一說，即係個個講同一隻股票會搭沉船。曾幾何時判斷恐慌好困難，因為到你知道恐慌時，已經喺報價見到。今日相對容易，因為社交媒體發達，食飯瞓覺都會搬上網講，輸錢咁大件事第一時間出post，當成個網上世界都講股災嘅時候，行另一個方向只係時間問題。
當然，上述三點都只係歸納，臨場決定，都係要學港女靠feel，冇feel，又點撻得著。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com