笑到最後｜虎年美股投資八件事（高明）
笑到最後｜虎年美股投資八件事（高明）
祝大家手上嘅持股虎虎生威、今年股市如龍似虎，最重要持貨能力有如老虎搵到擸物般緊握不放，恭喜恭喜。
虎年第一篇笑到最後，喺呢度首先同大家拜個年：所謂港股農曆年假，美股努力開市，本地駐美股二等股民，心情有如一個期望八
號風球嘅打工仔一樣，想有錢賺但唔使做。太認真嘅嘢今日相信大家冇乜興趣，就細數虎年投資八件事。
美股、外匯、加密貨幣免費即時報價，自選投資組合獲取相關新聞提示。
1. 當大家喺跌市同反彈之中掙紮，霸權股並冇將呢件事放在眼內，除咗較早前微軟（MSFT）收購動視暴雪（ATVI）之外，Sony（SONY）啱啱亦都公布收購第一身射擊Game公司Bungie，作價36億美元。可以話畀大家知，市場反覆係芸芸眾生嘅事，完全唔會影響企業入邊嘅精英收購。講到尾，擁有權先係佢哋關心嘅事，芸芸眾生關注嘅則係價格，切入點唔同。
今年股市有攔路虎
2. 若果用2021年等嚇就破頂嚟比劃今年，相信唔係太正確，因為今年明顯見到有攔路虎，亦都係符合虎年市況嘅其中一個特徵，事實上呢隻攔路虎由舊年11月開始已經出現，大家見到每逢炒得興起，聯儲局主席鮑威爾就會出嚟阻頭阻勢，踏入2022年，身邊仲有銀行家、分析員等傍友推波助瀾，鮑威爾話加一次，傍友話加3次；鮑威爾話加3次，傍友話加7至8次。可以預期，每次聯儲局議息會支持，呢班狐朋狗黨會出嚟做攔路虎，成為今年虎年嘅投資主題。
3. 美國有冇條件加息，應該交由經濟學術界去研究。客觀嘅事實係，經歷過美國2008年嘅QE，普遍已經接受咗透過摧毀貨幣購買力來達到政治目的，例如派錢、減稅、基建等等。正如本欄經常強調，減買債規模、減息、縮表，都只係過渡性，最後都會行返接近QE嘅情況，問題只係，當一大班狐朋狗黨勢凶夾狼咁講加息，市場嘅反應係全部反映喺股價上邊，所以有時獨立思考，短線都不敵fake news大合唱。
4. 依家仲要係，現屆政府拜登財經政策幾乎完全承襲奧巴馬年代作風，包括人選上耶倫由聯儲局主席轉任財長，行動上亦行緊奧巴馬年代加息高高舉起，輕輕放下。現時因為行緊上半部，所以市場以為佢嚟真，亦都夾雜其他原因一齊炸個市，但相信任期內加息放水加息放水會好似當年一樣不斷循環。
5. 不過，比起奧巴馬年代，拜登總統的確比較蝕底，特別係接近杖朝之年， 本來年紀大係冇問題，你睇畢菲特每年股東會及訪問幾精靈就知，偏偏拜登行為及言論經常偏離總統功能所需。部份政策亦有為期失言補鑊嘅趨勢，例如俄羅斯入侵烏克蘭事件，拜登最初話唔會制裁，言論出街後有反彈，立即制裁幾個烏克蘭人；又例如拜登因為通脹被記者追問，拜登諷刺咁話「通脹係政治資產，多啲通脹」，第二日鮑威爾言論更鷹，補鑊引致政策掉頭真係冇路捉。
6. 曾經紅極一時嘅契媽股，後尾改稱為高增長股，近期亦可以稱之為待富股， 喺現時加息以及政策混亂嘅情況下，可以話係冇著數。除非有個別主題，好似去年年尾嘅元宇宙咁，就可以炒起，但係大舉上升嘅情況喺鮑威爾任期內相信難以再出現。
7. 今年年頭一度有美股跌港股升嘅一種睇法，去到近期港股都係要跟美股跌好似又㓔咗少少。歷史宿命論，每次美股升勢去到末段，都係港股嘅爆發期，而呢個爆發期越嚟越短，始終港股同美股未完全脫鈎，至少港元都仲係受制美元，美元嘅資金緊縮點都會對港股造成一定壓力。但係本欄相信，未來港股同美股會越嚟越冇關係，唔係二元論，更大可能係升跌完全冇關係。
8. 簡單來講，美股將會繼續成為吸乾建制全球資金嘅主要市場，當中霸權股就喺現實同股票市場上兩邊賺達至「雙贏」。因為數碼化推演，工作環境冇以前咁局限喺辦公室，住宅嘅作用提升，在家工作常態化嘅國家，佢嘅樓市會持續上升，原因唔一定係因為量化寬鬆，主要原因係功能擴張。其他資金則會流入加密貨幣市場。至於港股，將會發展成有別於世界市況嘅股市。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com