港股無處是芳土
港股無處是芳土
市場預期美國聯儲局本周加息，圖為主席鮑威爾。(資料圖片)
估唔到由高位已經唔見咗12,000點嘅恒生指數，仍然係咁不堪一擊， 20,000點話穿就穿，唔好怪班好友一點反擊力都冇，實際上係之前跌跌不休，子彈已然殆盡，冇曬補給。
外圍因素俄羅斯烏克蘭泥漿摔
角，影響已不及之前，就算前兩日俄羅斯爭啲射咗粒導彈去波蘭，油價同股市都唔算話太震。但係其他地方局勢仍然有亂無休，日俄邊境又話有人搞搞震、印度竟然撳錯掣射咗粒導彈去巴基斯坦，伊朗可能眼紅委內瑞拉，失驚無神又射粒導彈飛咗去伊拉克美國領事館側邊，火頭處處，雖然未至於去到燎原，但係你話當冇事發生就假嘅。
最弊就係全球防疫Number 1嘅中國近排都頭痕，深圳禁足話做就做，市場擔心上海都會步後塵。若如此，一旦要禁足城市愈來愈多，又或是禁足時間未必一個星期可以完，內地今年嘅經濟預測難免又要削一刀。咁嘅情況之下，A股又點會有運行，難怪連最牛嘅預測，都改口風話上證綜指有機會三千點樓下先會有支持。
今個星期另一個危機就係美國FOMC醜婦終須見家翁，究竟講咗成年嘅加息，第一口會如之前市場預期嘅0.5厘，還是市場因應局勢變化而最新調低嘅0.25厘，又或是聯儲局主席鮑威爾突然大發神威第一口就加0.75厘。
不過，根據近排市場嘅綜合調查，債息嘅變化，以及突如其來嘅俄烏局勢變化。以上3個可能性得出對美股嘅結論，如果係加0.25厘，反而會令道指偏弱，因為市場會持續性擔心美國通脹失控，如果係加0.5厘，市場情緒或會轉趨審慎樂觀，相反如果加0.75厘，市場肯定會措手不及。
雖然上個月美國通脹7.9%低過市場預期，但唔好忘記油價因為俄烏戰爭爆發在3月先至反映，如果今次聯儲局唔敢落重手，未來幾個月美國通脹會更加失控。
恒指單日跌逾1,000點，最不妙的是跌市成交大增，對比之前每次港股反彈成交都縮一大截，貨多錢少，要重建一個似樣的反彈都唔係一朝一夕。暫時睇唔到形勢有扭轉嘅機會，只能夠靜觀其變，切忌急於一時三刻。今個星期美國加息、香港防控措施加碼、北韓見人射導彈佢又射埋一份，統統都是港股新威脅。靜待時機，恒指18,000點並非不可能。
專家搜羅 - 羅尚沛 舊文
本文作轉載及備份之用 來源 source: http://www.am730.com.hk