士佳說 - 張士佳 2022年3月15日
【#士佳說 】張士佳：質海味
【#士佳說 】張士佳：質海味
年初無事無幹，我覺得港股算平，但其後期指突插穿農曆新年底，知事有蹺蹊，但講不出個所以然，一真正開火，冇得講，幾平都唔可以買，除非可以唔理357年，尋日我寫美團，跌咗成日，觸及唔到我所講嘅買入條件，想買的投資者樂見愈跌愈平。另外，尋日我死好命，把握20113沽到，日光日白有充足時間通知到的學生，呢段唔使輸仲有得執。當然唔少投資者都仲有好多持貨，成日會問自己夠恐慌未，跌夠未？班大戶玩夠野未？點解美股唔跌，港股係咁跌，唔通俄羅斯冇得沽，就走嚟沽港股，要知道尋日唔係散戶沽，散戶只係喺度食花生兼自怨自艾，積極沽嘅反而係大戶，因為散戶沽通常就會大裂口低開然後彈返上嚟，昨日唔係咁，除咗第一浸，其他浸浸落，不問價沽；噉點解驚執輸嘅反而係大戶呢，又有人話係因為港股已經變左唔係國際城市，如果係都唔解尋日一夜之間變嘅啦，呢啲咁高深嘅嘢，我又邊度識吖。窮極無聊，無野寫，不如一陣八下我屋企附近幾班太太團嘅明爭暗鬥俾大家聽好過。不過，講番小小股先，＃330有盈喜，但風頭火勢，我會高開走些，手上貨已唔多，穿㡳就斬，走埋呢隻，等裂口高開先算，不過，睇黎一個上升裂口頂唔住，到時先算。呢幾日价殘，我都仲出，甚至踩埋果D高估值一腳，點解呢？
話説，我住開嗰頭，有幾班師奶，都係喺屋企攪雀局抽水，抽水最多係阿May，Chloe近年服務好，多咗人去打牌，名聲追緊上嚟，Swan以前都係抽水老大，但近年收入已大不如前，阿May唔係好睇得起阿Swan，但就成日好憎Chloe，覺得對自己好大威脅，以前表面和好，但後來口和心不和最後，直情面左左。師奶MAY最搞野，成日周圍潑火，以前想搞亂Chloe個局，但Chloe頂硬上，May冇佢符；與其係噉佢就暫時擺低Chloe，改為夾埋班太太團，搞swan，話佢嗰度啲牌唔啱規矩，叫大家唔好去Swan屋企打牌，自己喺外邊開局又唔受Swan玩，Swan嬲到震，充公曬班太太留喺佢屋企嘅海味鮑魚呀海參果D，阿May不嬲又唔係擺好多嘢喺Swan度，反而班太太團同Swan都有小小交易，以前成日去第度打牌擺低好多鮑魚呀遼參呀喺班太太屋企，而家攞唔返，畀阿美MAY搞到雞毛鴨血。
阿May見得米，又唔使勞氣，又唔使開拖，都可以搞到周圍雞毛鴨血，自已又冇乜事。食髓知味，呢招使得，佢就諗住再用呢招對付Chloe，班打太太知道May佢嘅野心，一旦玩杯葛，佢地怕Chloe學Swan沒收晒佢地放喺Chloe那裏的海味，呢啲鮑魚佢哋以前低價買落，喂而家與其有機會冇曬，噉就唔理喇，賣得一個錢得一個錢，幾咁平都照賣，所以不問價沽，否則第日幾多前景都唔關自己事啦，D海味遲D隱時都唔屬於自己嘅。阿May亦等埋班太太先出招，到時玩杯葛，有恃無恐，唔怕你沒收。
我點解知咁多，其實我都有份打牌，我又為食，下班太太買曬啲海味所以自己有時都買返啲嚟食，前一排見d遼參都平曬咪買啲囉，點知原來玩緊咁大鑊嘅嘢，我呢兩日都掟埋一份，不過我心血少，係噉意嗻。班太太怕老公返嚟唔見人，四點就收場，四點以後就冇得賣海味，所以我日日就偷呢啲空檔，湧出去買返轉，買完就食，都頂得下肚。
講番阿Chloe，佢都唔係省油燈，明知你班太太不問價賣海味，唔通佢托高個價俾你沽咩，分分鐘佢質埋一份等你賤賣啲添啊，諗返起都覺得Chloe高，舊年佢已經係噉質啲鮑魚燕窩出嚟，又話呢D膽固醇高又話嗰個有反式脂肪，長食對小朋友冇益，呢度唔啱嗰度唔啱，搞到啲海味跌曬價，我都唔明點解要噉做，尋日嗻嘛，風頭火勢，佢仲話你違反食物標籤條例，要巨額罰款，又踩多腳，而家睇落都有啲毛管戙，Chloe係眯咁高呀？佢直情樂見海參鮑魚大跌價添啦。
阿MAY做咗咁多年抽水一姊，當然唔係浪得虛名，佢係吼正你Chloe近日周身唔舒服，周圍出事，先至突然出招，加上Chloe屋企鬼咁多人，有啲人想做屋企揸FIT人，都唔知幾想Chloe周圍出事，籠裏雞想冇事就難嗻想出事就好容易，所以Chloe被搞到七國咁亂，唉算啦人哋啲家事都唔好提咁多，講得多都冇乜益.......
咁阿May幾時搞完Chloe呢？而家唔係咁單向，係Chloe都唔想亞May班師奶走得好价，第日大把本錢係阿May度東山再起，你走呀我質添，所以海味价尋日跌咁快，而家要等，等跌到個價吸引到唔關事嘅海味商，唔理你阿May Chloe，橫掂啲海味擺得，第日個价始終會升返，要佢地買齊先，但買嘅嘢可能就唔同曬，嗰班太太團以前買落太多海味，都有排沽，但唔係要一鋪過曬嘅；Chloe都底厚，而且May自己都一樣籠裏雞，一鋪搞唔完，今次Swan只係演習，唔頂得幾耐，事情好快過去，海味价咪上番D，但比May知道呢條蹺work，有排攪，咁死啦，我地咪唔駛買海味，咁阿May班客不嬲都只係鐘意食鮑魚海參，咁到個價太賤，既然May走Chloe質，in the mean time，夠膽嘅不如跟住隊鮑魚海參，膽汁少，底又唔夠厚嘅，就等住先，唔能夠幾年唔理鮑魚海參價嘅，就不要手多，等到反彈嘅時候，你就唔好再買鮑魚海參，轉為買花膠燕窩冬蟲草嗰啲囉。
士佳說 - 張士佳 舊文
本文作轉載及備份之用 來源 source: http://skycheung.weebly.com