笑到最後｜對沖基金之死（高明）
笑到最後｜對沖基金之死（高明）
一般可以畀大部份人買嘅對沖基金，個經理都冇操控結果能力。
《華爾街日報》報道，總部位於倫敦嘅對沖基金Marcho Partners，主要集中投資科技股，基金高位曾經管理10億美元資產，由高位計至今年上半年下跌84%。相對前女
股神Cathy Wood嘅Ark Invest（ARKK）下跌45%，同樣專注科技股嘅老虎環球管理今年下跌50%。可以見到Marcho既冇對沖減少損失嘅功能，蝕得多，賺又唔一定多過一注獨贏某股。
美股、外匯、加密貨幣免費即時報價，自選投資組合獲取相關新聞提示。
據講，Marcho集中投資幾隻股包括Shopify（SHOP）及Cazoo（CZOO），其中CZOO輸得最慘，呢隻係經SPAC殼股上市美國嘅英國二手車網站股，Marcho持股價值由1.25億美元跌至1,500萬美元，跌幅88%。
對沖基金仍然大把人搵食，亦都相信收入唔錯，包括英國保守黨競逐黨魁嘅Rishi Sunak ，都係對沖基金出身，被認為係下議院最有錢嘅議員。所以對沖基金之死，係啲客死啫，從業員冇死喎，情況有如舊書《客戶的遊艇在哪裡？》，遊艇商人介紹邊隻邊隻遊艇係邊個banker嘅，有個人用皇帝的新衣口吻問邊隻係客戶，答案當然係無，亦可以話啲錢係全部嚟自客戶。
自己炒好過畀人炒
對於大部份芸芸眾生嚟講，投資基金嘅必要性好低，少部份因監管唔容許買賣股票而買基金，實際上基金買嘅你都買到，操盤嘅能力，其實大家差唔多，因為都係對未來無法預知，所以分別唔大，炒股技術亦有時效性，時間一過，指標會變燈，身處其中好難跳出嚟話「我相反做咪得囉」。
更重要原因，係law of one price，不同資產嘅波幅會趨向接近，Bitcoin同美股嘅同步越嚟越高，不同股份嘅分別亦係相對大市唔同倍數嘅關係，好難跳出大市走勢框架，變相要發圍除非預知未來。預知未來只有兩個方法：一、未來人；二、能夠控制結果。一般可以畀大部份人買嘅對沖基金，個經理都冇操控結果能力。
變咗基金經理都好難發圍，而對沖基金要交對沖租，升市時冇腦期權對沖燒錢，跌市正股都係炸死，有時反而變worst of both兩頭唔到岸。
如果份工冇特別監管，自己炒、輸喺自己手好過。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com