平民投資教室 - 錢俊 2022年11月22日
【平民投資教室】錢俊：不要太快說加密貨幣已死
平民投資教室
日期：2022-11-22
更新時間：10:35:00
十一月股市洋溢著反彈氣氛，另一邊箱，全球三大加密貨幣交易所之一嘅FTX爆煲令幣市震盪，有業界人士指係幣市「雷曼事件」翻版。一眾傳統資產投資者又即刻出嚟講加密貨幣係垃圾，係騙局等。
錢俊認為呢刻就宣告加密貨幣死亡顯然過於武斷。如果今次係幣市「雷曼爆煲」，咁今次主要加密幣市場嘅表現已經算唔話得。以比特幣而言，上月至今跌約15%，以太幣跌13%；而美股標普500指數喺2008年金融海嘯整年跌37%。當然用呢個時間線比未必公平，但用作參考嚟睇，至少主要加密幣市場未有如金融大鱷所言出現「崩盤」。
另一方面，傳統金融機構未有因此而放棄發展加密貨幣業務。比如上周就有報道話南方東英正考慮推出本港首年加密貨幣期貨ETF；消息正正喺FTX爆煲後先傳出，顯然公司未有因此影響計劃。港府都有意發展加密貨幣行業，近期亦向公眾諮詢相關事宜。
因此，加密貨幣顯然未完成其歷史任務。成功都係從錯誤中學習，今次事件後或者業界會定立更多自律守則，甚至監管機構或插手整頓。痛楚之後，發展空間仍然係廣闊。當然，幣市波動性仍然遠較傳統資產高，就算喺FTX事件前，今年比特幣都已經跌超過50%，之前所謂以幣市對沖傳統資產嘅講法已站不住腳。現階段仍然係以閒錢少注玩嚇，或作為高風險投資一部份較為穩妥。
MILN：千禧世代消費市場
創立FTX嘅90後薯條哥，年紀輕輕已成為幣市呼風喚雨嘅巨頭。未來嘅年輕一代只要有創意，要致富或者比從前更易；另外更多嘅富二代亦更懂得去享受生活。好多公司已經著手向呢班90後或00後打主意。
Global X Millennial Consumer ETF（US:MILN）就以主打「千禧世代」為概念，聲稱所投資嘅公司為主要受惠於美國出生年份介乎1980 年至2000年不斷增長嘅消費能力及獨特偏好。呢類公司涵蓋廣泛投資板塊，包括社交媒體及娛樂、食品及餐飲、服裝及服飾、健康及健身、旅行及出行、教育及就業、住房及家居用品，以至金融服務。
頭二十大持股包括星巴克、Home Depot、Nike等，亦有網上平台及IT巨頭Booking.com、Uber、蘋果公司及Google等。就咁睇，似乎與一般消費ETF分別唔大，以「千禧世代」做賣點似乎有啲掛羊頭賣狗肉。
以類似嘅Consumer Discretionary Select Sector SPDR Fund（US:XLY）作比較。XLY管理費只係0.1%，但MILN要0.5%，貴成五倍。回報方面，XLY年初至今及五年回報為負31%及正59%，相比MILN同期負35%及正49%都優勝。基金規模嚟講，XLY都係MILN嘅14倍。故事說得好，唔等於你就確實做得好令人哋buy你。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com