預先想像蘋果點被取代，都係一種提前嘅心理準備，畢竟蘋果係今個世代嘅龍頭股。
笑到最後｜蘋果會是如何被顛覆（高明）
上星期講到，微軟（MSFT）配合ChatGPT嘅組合，只要Google(GOOGL)繼續食老本，後者一定會被取代。當然，取代還取代，Alphabet一直向上遊發展，各網上基
建嘅伸延程度夠闊，股價唞夠再開車唔難，微軟都係咁不斷破頂。
美股外幣即時報價 多國新聞任睇
但由ChatGPT嘅AI打擊Google嚟睇，暫時未被挑戰嘅霸權蘋果(AAPL)，維持硬件加程用程式平台嘅「蘋果稅」組合，雖然好就手，但相同嘅老本已經食咗超過十年，硬件又冇再更新，正值幾年難得一遇嘅巨變，預先想像蘋果點被取代，都係一種提前嘅心理準備，畢竟蘋果係今個世代嘅龍頭股。
四個劇本的可能性
世界已經過咗幾個後生仔車房整舊嘢變巨無霸年代，今年打到Google頭崩額裂，都係因為OpenAI夥拍大佬微軟，先有撼動嘅憧憬。要打得鬱蘋果，數手指都將會係嗰幾間公司。
劇本一：Bing+ChatGPT嘅new Bing筆鋒一轉，轉戰操作系統，微軟本來先係OS大佬，手機顛覆咗PC先被咬一啖，Windows phone又唔成氣候，如果新嘅操作系統可以零code用家任改甚至簡單自製app，配合微軟本身嘅硬件，取代未必咁快，蘋果股價短線恐怕要血洗。
劇本二：Google搜尋器捱打，圍魏救趙，強攻OS，ChatGPT畀嘅答案係：「提供更好的用戶體驗：在操作系統的用戶體驗上，谷歌可以繼續努力，提高Android的流暢性、響應速度和穩定性，同時提供更人性化的操作界面和更好的用戶體驗。」雖然要做一早做咗，但本業出現危機，先有機會激發一間巨無霸鬱一鬱。
劇本三：外判畀ChatGPT答：「技術變革：技術在不斷變革，新技術的出現可能會對 App Store 的地位產生影響。例如，去中心化應用（DApps）的出現，它們不依賴於中央服務商，能夠提供更安全和去中心化的應用服務。」
劇本四：AI對答寫程式考試樣樣掂，半年前仲係科幻小說，依家大家已經用緊。唔難想像早兩年炒過嘅3D打印未來會有突破。承接劇本三：先用AI設計手機，再自行用3D打印整部個人化手機，最終達致手機都係砌機嘅「黃金化」，蘋果應該仲係市佔前列，正如有得去黃金，都會有人買HP, DELL同Macbook，但每個人嘅idea都係蘋果嘅競爭對手。
AI呢個概念，肯定比元宇宙NFT玩得更耐，因為微軟再投資，唔等錢使相信冇咁快會見到佢上市，只要冇上市玩爛輸死人，就唔會被投資情緒影響業務。
大家可能會問，點解劇本冇Elon Musk份？因為首富忙緊玩玩具，回幾年氣過多幾年應該又做正面新聞嘅主角，所以呢一轉AI應該冇佢份。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com