【平民投資教室】錢俊：負面政策陸續有嚟？
平民投資教室
日期：2023-03-08
更新時間：08:19:40
經過今年1月反彈，2月回吐似乎又返去年初嘅起點。3月之始，個個都聚焦今個星期開始嘅兩會。
與其他國家及市場唔同，中國係計劃經濟，喺去年尾黨大會同今周兩會入面，會定下政府所有施
政嘅政策方針，指明方向，再「理順」下面落實政策嘅人同地方政府嘅實際措施。另外，領導人講稿上，有無新嘅篇幅，或某啲嘢上年有提今年無再提，都係對未來政策嘅啟示。
比如某些行業嘅相關政策方針。例如房地產，到底仍否會提到支持住宅交付，還是繼續提到只住不炒嘅方向。另外，對碳排放及碳中和，會唔會仲有新嘅篇幅交代，或有利新能源及電動車。
另外，上周已經定咗今年GDP目標為5%。以市場對中國對外開放嘅正面憧憬而言，感覺好似比較保守。有可能係因為要建立某啲緩衝，包括繼續對某啲行業推出監管措施，或者實施對外制裁而令某啲領域受損等。因此，經濟甚或股市嘅復甦，可能唔係一帆風順嘅反彈。
2803：「ChatGPT」式揀股投資中國
投資中國大多香港投資者都大有經驗。除咗自己揀股，去年錢俊都有提及用科技幫手揀股。一般ETF投資大市嘅指數，主要以公司市值嚟決定成份股同佔比。此外，投資學都有另一個叫因子投資（Factor investing）嘅概念。因子投資喺制定指數時，會考慮埋市值以外嘅元素，例如以公司財務健康狀況、市盈或市帳率、股價波動性等方面嚟決定組成部份。當時我亦介紹過用此方式投資嘅美股ETF BlackRock U.S. Equity Factor Rotation ETF（US:DYNF）。
而返嚟香港市場，Premia 中證財新中國基⽯經濟 ETF（02803）就係一隻以因子投資方法揀股嘅ETF，由發行商睿亞資產與內地指數公司中證財新銳聯合作，以因子投資原理制定該ETF追蹤嘅指數。基金本身投資範圍可涵蓋2800隻A股，然後透過高質素、低波動及價值被低估嘅等客觀數據，揀出約300隻成份股。每年再按市值加權調倉。
咁到底係科技揀股嬴定大市指數嬴？2803過去一年只係跌4.7%，已經嬴曬美股標指同港股恆指表現。而三年、五年及十年嘅年化回報，分別為7.2%、2.4%同10.4%，亦跑嬴A股滬深300嘅3.3%、1.6%同6.7%。似乎飲得杯落。
然而，買ETF除咗表現，仲要睇多幾樣嘢，比如你自己有無偏好某個行業？以2803為例，首先就無港人熟悉嘅香港上市科網股，而金融業佔近40%，若果預期新經濟股會大反彈，呢隻基金未來或會跑輸大市唔少。另外，發行商嘅信譽同ETF嘅成交量都好重要，如果基金無乜人買，發行商最終選擇撤出香港市場，ETF可以突然宣佈摺埋退市，到時要被迫係唔啱時間嘅低位賣貨，就得不償失。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com