想當年港股靠著不同的關係，炒個不亦樂乎。
近日出城同兩位舊朋友X見面，其中一位都接近兩年冇面對面見過，疫情口罩嗰啲嘛。傾開最近一單新聞嘅主角，講起我哋其中一個共同朋友P都識佢，話咩讀書時識。講起覺得奇怪，兩個人一個讀男校，一個讀女校，讀書時候識，可能只係聯校晚會之類嗰啲活動，如果冇拍過
拖嘅話，極可能只係同場合大家出現過，過百人嘅活動，傾計未必多過三句。
美股外幣即時報價 多國新聞任睇
「嗰時香港開緊Party，每個人都係話識邊個邊個。」
將人際關係直接當成資本出售，可能玩得最盡，就係嗰個年代嘅香港，甚至毋須真係識嗰個人，只須向外宣稱自己識好多人，令側邊聽嘅人覺得你有利用價值，自然就可以產生交易。
雖然中國人講求關係，但中國係世界工廠，就算冇關係，只要有產品，放上淘寶，唔使同人Social，夠平就有單；美股社交媒體明顯係賣人際關係，但設計、規則、演算法、數據等等，都係超出純關係嘅交易。其他咩日本台灣等等，有晶片技術，個別有戰略資源嘅廠，你有需要會主動搵佢哋。
只有嗰個年代嘅香港，係咁直接咁只賣關係，而事實上，冇製造業、冇科技嘅香港，唔賣關係又賣啲乜呢？
想當年港股瓣數多
但就係有呢啲關係，嗰個年代嘅港股，雖然冇牛市（真正牛市，恒指起碼要突破07年3萬點以上再發展先算，其實都只係十年上落市），但係關係帶嚟國策股、殼股、妖股，好多人為咗攀附背後莊家，出盡力氣推動相關股份，結果造就上述類別嘅股份喺互為關係嘅情況下都有好過勁嘅升幅，之後跌當然係後話。
唔好誤會，我並無道德判斷，進入股市，所有投資者都係貪，無人比其他人更高尚。如果冇背後嘅利害關係，就冇咁多人頭、唱好、搭棚、炒高、互控等等嘅需求，呢啲需求令到一啲本身冇乜價值嘅股票曾經閃亮過，比起現時曲終人散氣氛，梗係好得多。
截稿前攤開港股20大升幅，睇升幅率雙位數字好勁，但竟然可以睇到成交額只係得幾皮嘢，仲要有4-5隻係咁，甚至有幾千蚊成交額都可以上升幅榜，以前係幾難想像，因為唔過千萬成交都幾難推得鬱股價，自己買上實畀莊家打返落嚟。當然，現時亦有佢嘅新秩序，再講本欄就會變成想當年尖東幾多日本遊客幾風光邊會有死場嗰類，始終天下無不散之筵席。
派對完結，不外乎有三類人：一、未完嘅時候借頭借路去廁所，點知已經上的士返屋企；二、禮貌同其他人拜拜，邀請其他人一齊坐車走慳返啲車費；三、唔肯走，覺得派對未完，要拉埋其他人直落唱通宵K飲到中酒毒為止。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com