日本係全球唯一維持負利率，兼繼續無限買債嘅經濟體。
鷹派鴿派之間，仲有騎牆派！上周美國聯儲局議息，一如預期加息0.25厘，市場焦點落喺下次9月議息會否再加息，主席鮑威爾話：「可能再加⋯⋯亦可能唔加。」儲局通脹指標PCE物價指數上周五出爐，顯示通脹繼續放緩，令再加息預期降溫。睇利率期
貨，市場押注9月凍息機會為80%，再加息機會為20%；而年底前，再加息機會亦不足30%，符合儲局6月嘅點陣圖。另外，當局為防銀行危機重演，提高資本要求，變相收緊貸款，係喺加息以外，另一收緊措施。
美股外幣即時報價 多國新聞任睇
上周議息嘅，仲有歐洲央行同日本央行。歐央加息0.25厘，預咗；日央維持利率不變，亦預咗。出乎意料嘅，係日央調整孳息曲線控制（YCC）政策，雖然作為長期利率指標嘅10年期日本國債孳息波動區間維持喺±0.5厘，但上下限僅作參考，非死板限制；而且每日將以1厘購買10年期國債，比以往嘅0.5厘為高。此舉反映日央對貨幣政策長期寬鬆嘅副作用，已感到擔憂。容許長債息率上限突破0.5厘，如同變相加息，上周五日圓大上大落，牽動環球金融市場。
日債實際影響 要睇今日操作
日央4月換屆前，已多次傳出YCC將鬆綁，但都係「狼來了」，上周四晚《日經新聞》再傳風聲，到上周五日央竟然嚟真，日本股滙仍免不了波動。日圓先跌後升再跌，兌每美元低見141.19，高見138.07，收141.15，跌1.2%，高低波幅達2.2%。日股一度跌2.6%，收市跌幅收窄至0.4%。日本10年期債息收0.556厘，升穿0.5厘上限，實際影響要睇日央今日嘅最新操作。日本投資者喺美債、歐債持倉龐大，日債孳息回升，對環球資金流向會有影響，市場關注日央喺幾大程度上幹預債息。
值得注意嘅係，日本係全球唯一維持負利率，兼繼續無限買債嘅經濟體，微調YCC，只係將無限買債嘅價格稍為提高。日圓率先回軟，或許反映市場評估日圓未必受新政策影響。喺日圓回軟下，資金重新入市，上周五美股道指、標指、納指分別反彈0.5%、1%、1.9%；追蹤美國上市中概股表現嘅納斯達克金龍中國指數，更喺憧憬中國出招振興經濟下，飆升7%；港股ADR比例指數高水162點或0.8%，重越20000關；藍籌中槪科網股ATM，美國股價亦分別較香港高2.2%、2.3%、2.4%。
憧憬中國出招 信証睇高一線
上周五港股期指結算，恒指低開高走，收19916，升1.4%，成交增至1,377億元。好友成功反攻，得力內地股市。內地股市急升，因內地媒體突然引述證券商建議「降低印花稅、實施T+0」，以實現政治局會議提出嘅「活躍資本市場」，市場憧憬利好政策將至。恒指過去3個月喺周線保歷加通道中軸至底部上落，現時通道收窄待變，若能企穩中軸之上，可望上試頂部20600水平。
上周一政治局會議後，中證監隨即召開座談會，表示要從投資端、融資端、交易端等方面綜合施策，市場預計將向提高交投活躍度、引導中長期資金入市等方向著手。上周五中資券商股急升，中金（3908）、中信証券（6030）都升一成。信証係行業龍頭，喺內地IPO承銷、股權融資、再融資承銷、私募資產管理等，上年都排名市場第一，最能受惠A股回勇。花旗、瑞信、高盛、摩通分別給予目標價22.44元、20.2元、17.87元、17.7元，信証現價16.68元，走勢呈區域突破。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com