笑到最後 - 高明 2023年12月9日
可以大膽假設，如果冇小朋友，三千萬元退休應該夠，大不了老咗綜援+公屋。 (Jub Job via Getty Images)
劉德華嘅其中一套電影名句：三億啦，三億就一世無憂。引嚟無數中二病人抄襲，網上世界講三千萬元退休，好似唔夠霸氣，一開口叫價三億，先至大到人。
美股外幣即時報價 多國新聞任睇
相當於1,219年年薪
數字顯示，港人2023年第3季就業收入中位數為20,500元，三億大概等於收入中位數人士1,219年年薪，一家四口，除返開每人中位數受薪304年，唔怪得之話夠。三億夠應該冇乜爭議。
再推低一級，吳彥祖價三千萬港元。全部少一個零，122年年薪，一家四口30年年薪，亦都好難怪話唔夠，因為假設乜都唔做，甚至啲錢特登放喺冇利息嘅支票戶口度，細路長大後30歲之後要開始搵工，大人就好少少，假設大約40歲有三千萬元，70歲差唔多使哂，夠年齡拎綜援公屋同生果金，都叫老咗有個錢傍身。
港人2023年第3季就業收入中位數為20,500元，三億大概等於收入中位數人士1,219年年薪。 (UnitoneVector via Getty Images)
三千萬其實也夠使
可以大膽假設，如果冇小朋友，三千萬元退休應該夠，大不了老咗綜援+公屋。
至於買樓，唔行老咗住公屋條路，都要買間樓自住，無後顧之憂當然要Full Pay全部畀曬，一般嚟講，三份一收入用嚟供樓交柤好合理，推而廣之身家三份一用嚟買樓都正常。
本來三年前，拎住一千萬蚊都冇乜選擇，經紀見到你得一千萬蚊咁少實推你去買冇房新盤。好彩呢兩年樓價平返，如果喺好多地產舖嘅地方大叫我有一千萬蚊買樓，一定有大把經紀湧嚟。簡簡單單藍籌區苑太古城，依家一千萬元已經有選擇，唔係以前將你歸類為Cheap客嘅水平。
有剩兩千萬元，粗粗哋拎去定期至買美國國債，平均4.5厘以上應該冇問題，90萬港元利息，雖然用嚟買名車有啲窄，但屈就啲用應該一年去5次日本冇乜問題。
好多人都會話，利率唔會長期維持高水平，所以三千萬蚊都係唔夠。但亦都唔代表利率見頂後，會立即減息，到時減息銀行經理自然會Sell你其他理財產品，只要啲理財產品唔爆煲就唔會有事。
所以，三千萬蚊其實都夠退休，換一換環境例如搬去泰國仲更加Easy Mode容易模式，生埋細路都冇問題。事實上，呢句對白嗰套戲嘅香港票房都係2,653萬港元，仲要係07年港股直通車年代，所以三千萬元其實都算係咁。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com