笑到最後 - 高明 2024年1月27日
要解釋恒指升跌對一般生活有冇影響，一定要返轉頭講咩嘢叫經濟好。 (ymgerman via Getty Images)
恒指一度跌穿15000點水平，指數回歸1997年8月水平，新嘅論調隨即形成，包括恒指升跌對一般生活冇影響，以及股價跌先勁。
美股外幣即時報價 多國新聞任睇
港股一路走來始終如一
香港股票，一路走來始終如一，都係用嚟賣。只要大家冇發行股票嘅能力，其實股價升跌同一般人冇乜關係。股價上升嘅用途，最上層係畀國企公司進行債轉股，課本啲嘅講法就係將社會公共開支轉移再轉移到股東身上，發債本來要還，轉咗股還都慳返，夠期又再轉過，良好意願嘅理論係，借一部份國有上市公司維持公共服務嘅開支加速發展，而無需直接抽稅。
中層嘅私人大企業就透過股價上升集資，滿足投資項目；下層更加直接，恒指作為招牌，股價上升氣氛好，滴漏效應IPO新股或買賣殼股活動受惠。
要解釋恒指升跌對一般生活有冇影響，一定要返轉頭講咩嘢叫經濟好？每年電視台新年街訪，答嗰個一定話經濟唔好，不論股價及樓價升定跌。至於的士找唔找錢，到後期已經「老逢」0.1蚊向上收齊頭，所以都唔能夠作準。
經濟好，就係你得一個人，但有五份工爭緊你。本來你只係揸的士，以前小巴舊同事記得你有小巴牌，會無端端打嚟問你星期日得唔得閒踩返更；另一個轉咗做保安嘅舊同事，又會問你夜晚不如做埋保安反正都係瞓覺。基本上好難直接量度，但每隔幾年就會出現呢啲情況。
經濟好，就係你得一個人，但有五份工爭緊你。本來你只係揸的士，以前小巴舊同事記得你有小巴牌，會無端端打嚟問你星期日得唔得閒踩返更。 (tifonimages via Getty Images)
Apple倘大跌 股神嗌救命
點解會出現呢啲現象？梗係因為資產泡沫形成，上層集到錢，投資一啲新項目，例如起多幾棟住宅酒店等，由律師會計到保安清潔，總要有人做。
無泡沫就唔會出現呢啲新嘅需求，如果大家都係打份工，冇人挖角，冇人塞多份外快畀你，每日返放工已經夠忙夠攰，係唔覺經濟差咗，所以恒指跌，對日常生活只係跌走咗啲從無出現嘅新機會，本來無一物，唔會有人因為失去一樣從未出現嘅寶物而覺得可惜。
至於「股價跌先勁」，出處來自香港第一股評人沈大師振盈，香港人生活如常，無懼恒指回歸97年，已經見證咗「股價跌先勁」，試嚇蘋果（AAPL）股價跌返落97價，畢菲特可能都要嗌救命。有如網絡潮文：巴郡（BRK.A）裡頭的基金經理來香港玩牛熊證只生存到三個交易日。
有網絡潮文指巴郡（BRK.A）裡頭的基金經理，來香港玩牛熊證只生存到三個交易日。 (Scott Olson via Getty Images)
所以香港真係一塊福地。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com